DILI, 03 Setembru 2024 (TATOLI) – Diretór Nasionál Konservasaun Floresta, Ministériu Agrikultura, Pekuária, Peska no Floresta (MAPPF), Pedro Pinto, husu ba komunidade iha territóriu atu proteje Laku, tanba nu’udar animál ne’ebé fó kontribuisaun hodi hasa’e valór ekonómiku iha rai-laran.
“Ha’u husu ba komunidade sira atu proteje Laku sira ne’ebé moris iha floresta, tanba sira mós fó kontribuisaun hodi hasa’e valór ekonomia, liuhusi kafé fuan ne’ebé sira han, depois sira tee fali mai, kafé sira ne’e hanaran laku teen, kafé sai musan mutin no moos, depois komunidade grupu kafekultór sira, rekolla hodi fan fali ho presu ne’ebé aas”, Pedro Pinto hateten iha Caicoli.
Tanba ne’e, nia husu ba komunidade ne’ebé hala’o atividade kasa iha ai-laran sira atu tau iha konxiénsia hodi proteje animál sira ne’e atu labele lakon. Bainhira komunidade sira la valoriza animal sira ne’e, ba futuru sei lakon mohu iha Timór sei halakon mós valór ekonónimu.
“Husu ba kasadór sira atu proteje animál sira ne’e atu sira-nia populasaun bele aumenta iha ai-laran sirah hodi hasa’e kualidade kafé, atu tulun kafekultór sira bele hetan presu kafé Laku teen ho folin di’ak”, nia husu.
Daudaun ne’e, Timor-Leste rejista Laku ho tipu rua mak Laku mutin no metan. Husi laku rua ne’e, populasaun barak liu maka Laku mutin kompara ho metan.
Laku rua ne’e sempre halo sira-nia atividade iha tempu kalan. Sira barak liu moris iha fatin ne’ebé kafé barak hanesan iha Ermera, Ainaro no Liquiçá.
“Ita seidauk halo estudu ida hodi rejista totál populasaun Laku hamutuk hira maka agora eziste iha ai-laran tuan sira, maibé ita iha estimativa ida katak Laku mutin nia populasaun barak liu Laku metan”, adianta.
Pedro Pinto salienta katak Laku mós nunka hela hakmatek iha fatin ida. Sira sempre muda husi fatin ida bá fatin seluk bainhira ai-han iha fatin refere laiha ona. “Sira halai bá fali fatin seluk hodi bele hetan ai-han. Atividade ne’e, Laku sira hala’o iha tempu kalan, tanba loron sira subar aan iha ai-kuak, iha tua-metan nia laran hodi asegura aan husi grupu kasadór sira”, dehan.
Jornalista: Tomé Amado
Editora: Maria Auxiliadora
