Top

PD husu líder nasionál sira unidu dezenvolve Timor-Leste

Deputada Bankada Partidu Demokrátiku (PD), Maria Teresa Gusmão. Imajen Tatoli/Nelson de Sousa

DILI, 03 setembru 2024 (TATOLI)—Deputadu husi bankada Partidu Demokrátiku (PD), Maria Teresa Gusmão, husu líder nasionál sira atu hamutuk iha unidade hodi dezenvolvimentu nasaun Timor-Leste ba oin no liberta povu husi mukit.

Notísia Relevante: Mandati kontinua husu líder nasionál hamutuk liberta povu husi mukit

“Kona-ba kestaun ita-nia líder sira, ita fiar katak sira ho sira-nia istória rasik no sira hatene rasik saida mak sira enfrenta iha difikuldade no mós unidade. Ita haree, iha oin, sira laiha unidade maibé ita fiar katak sira hatene malu saida mak sira konkista ba malu. Maibé, ita espera to’o loron ida, sira sei hasoru malu,” Nia hateten ba jornalista sira iha resintu Parlamentu Nasionál, tersa ne’e.

Nune’e, nia dehan, hein katak sira-nia fuan sei fó ba malu no tempu sei hatudu ida-idak ho nia razaun, no ida-idak mai ho nia istória no prinsípiu maibé sira mesak timoroan no Timor ida de’it.

Reprezentante povu iha uma fukun PN ne’e hateten, ho Amu Papa nia vizita no timoroan sira-nia harohan da’et ho mós espirítu erói sira sei fó tempu ida, líder nasionál sira sei hamutuk hodi lori Timor-Leste ida ukun aan ne’ebé ho kualidade.

“Espera, sira sei hasoru malu hodi fó liman ba malu iha unidade atu lori povu no rai ida-ne’e ba oin, tanba sira hamutuk liberta tiha ona pátria no oinsá atu hamutuk nafatin, atu liberta povu husi mukit,” nia dehan.

Jornalista : Nelson de Sousa

Editór       : Cancio Ximenes               

Publisidade

Leave a Reply

Latest Post

error: Content is protected !!