DILI, 02 setembru 2024 (TATOLI)—Deputadu husi FRETILIN, David Dias Ximenes “Mandati”, kontinua husu líder nasionál sira atu hamutuk hodi lori dezenvolimentu nasaun ba oin hodi hasai povu husi mukit.
Notísia Relevante: David Mandati husu líder nasionál hamutuk liberta povu husi mukit
“Ita tenke hatene katak, ita iha mundu, moris ne’e sempre iha diferensa. Diálogu, debate, diskusaun, labele fó kotuk ba malu, lori sira-nia laran luak ba malu, nune’e ita haree fali problema seluk,” Mandati hateten ba jornalista sira iha resintu Parlamentu Nasionál (PN), segunda ne’e.
Ema moris iha polítika nia laran, nia dehan, ida-idak iha nia imprensaun progama saida mak atu halo hodi dezenvolve povu, maibé líder sira bele tuur hamutuk diskute hodi ko’alia ba malu atu buka buat ne’ebé di’ak duke mout iha diferensa no diferensa ne’e tenke ajuda dezemvolve ema-nia hanoin maibé agora diferensa sai halo fali ema inimigu ba malu.
“Ida-idak iha nia fatin, Ramos Horta ho Mari Alkatiri diplomásia nian, no Xanana Gusmãp ho Lú-Olu guerilleiru forsa armada ninian, diferensa entre sira na’in-haat (4) ne’e, saida ne’e laiha maibé haree ba malu la hasee ba malu,” nia dehan.
Hanesan iha Parlamentu Nasionál iha plenária laran, nia hateten, dalaruma diskusaun to’o hakilar no tuku malu iha laran, maibé sai fali ba li’ur ne’e di’ak malu baibain no la rai ódiu ba malu.
Nune’e, Timor-Leste ko’alia rekonsiliasaun ho timorroan maluk sira iha Timor Osidentál maibé líder nasionál sira laiha unidade hamutuk, inklui Timor-Leste mós adota ona dokumentu fraternidade umana, hodi ko’alia pás rai-liur maibé líder sira iha uma laran ka rai-laran ne’e laiha unidade.
Notísia Relevante: Mandati hasoru Xanana iha Cipinang ko’alia serbisu frente klandestina ba prosesu referendu
Jornalista : Nelson de Sousa
Editór : Cancio Ximenes
