OÉ-CUSSE, 03 Setembru 2024 (TATOLI) – Sarani 400 husi Rejiaun Administrativa Espesiál Oé-Cusse Ambeno (RAEOA) viajen ona bá Dili ho ró Berlin Ramelau atu partisipa misa solene ne’ebé prezide husi Papa Francisco iha Tasi-Tolu, ne’ebé sei akontese iha 10 Setembru 2024.
Prezidente Konsellu Pastorál Parókia Numbei, João Evaristo Bobo, hateten dezlokasaun sarani sira husi Oé-Cusse bá kapitál ho fazeadamente, ne’ebé fahe ba ekipa lima hahú husi loron 03 to’o 07 Setembru.
“Oráriu ne’ebé ami simu husi nasionál katak Oé-Cusse dook liu, ne’ebé agora hahú dezlokasaun ba [peregrinu sira] etapa dahuluk hamutuk 400, kompostu husi funsionáriu 125, sarani husi parókia Numbei 68, Padiae 54, Oésilo 54, Pássabe 54, nomós Baoknana 54”, João Bobo informa ba jornalista sira iha portu Iwao Kitahara Mahata, Oé-Cusse, ohin.
FOTO ATUÁL: Peregrinu husi Oé-Cusse hahú viajen ba Dili ho roo Berlin Ramelau
Dirijente ne’e salienta katak peregrinu sira-ne’e mós iklui ministru estraordináriu na’in-40 husi kada parókia, nomós joven 14 ne’ebé sei partisipa enkontru ho Papa iha Sentru Konvensaun Dili (CDD).
Nia adianta katak iha loron 04 Setembru, peregrinu hamutuk 500, ne’ebé mai husi parókia Numbei 300 no Padiae 200 mak sei viajen bá Dili. Iha loron 05, sarani sira husi parókia Numbei 330 no Padiae 152. Iha 06 Setembru, ema na’in-495, husi parókia Oésilo 156, Pássabe 123 no Baoknana 216 mak sei viajen mai Dili no iha 07 Setembru, ema na’in-347 (husi parókia Numbei 108) mak viajen bá Dili.
“Totál peregrinu husi RAEOA hamutuk 2.344 mak bá partisipa misa iha Tasi-Tolu no sei hela iha Pelican Paradise”, informa.
Notísia relevante: Vizita Papa Francisco lori grasa mai Timor-Leste
Marileta da Silva nu’udar katekista husi parókia Numbei sente kontente maske viajen dook, maibé ho entuziazmu atu partisipa misa ne’ebé dirije husi Papa Fransisco iha Tasi-Tolu.
“Orgullu ho loron ksolok ida-ne’e katak ita hotu durante ne’e hein duni ita-nia Santu Padre atu mai iha ita-nia rai doben Timor-Leste. Tanba ne’e, ami haksolok tebes maske bá to’o Dili, maibé importante bele partisipa misa hodi hein bensaun husi Santu Papa”, salienta.
Pedro Ili nu’udar Konsellu Pastorál Parókia Oésilo dehan ho vizita pastorál Papa nian ne’e lori dame hodi hametin fé no kultura sarani sira iha Timor-Leste.
“Ha’u hanesan Konsellu Pastorál Parókia Oésilo, ne’ebé reprezenta sarani tomak atu viajen bá Dili hodi hasoru Santu Padre Francisco nia vizita primeira vés mai Timor-Leste. Santu Padre mai atu lori pás no hametin ita-nia fé no hametin mós ita-nia kultura”, nia realsa.
Notísia relevante: Konstrusaun toilet públiku iha Tasi-Tolu konklui ona
Viajen peregrinu sira ne’e hetan akompañamentu husi Polísia Nasionál Timor-Leste (PNTL) no hafoin to’o portu Dili dezloka kedas bá akantonamentu iha Pelican Paradise Tíbar.
Jornalista: Abílio Elo Nini
Editóra: Maria Auxiliadora
