DILI, 03 setembru 2024 (TATOLI)—Vise bankada CNRT iha Parlamentu Nasionál (PN), Patrocínio dos Reis Fernandes, hateten nu’udar sarani Katólika sente priviléiju no orgullu tebes bainhira Timor-Leste hetan vizita husi Sua Santidade Amu Papa Francisco nu’udar Xefe Estadu Vátikanu no Líder másimu Igreja Katólika ne’ebé bele lori grasa oioin mai Timor-Leste.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Sua Santidade Papa ne’e, nia hateten, aleinde nu’udar Xefe Estadu ida iha Estadu Vatikánu maibé mós hanesan líder mundiál ba relijiaun Katólika, no la’ós de’it relijiaun Katólika maibé relijiaun sira seluk ne’ebé kristá maibé sira balun rekoñese Amu Papa nu’udar sira-nia líder másimu.
“Nu’udar Katóliku hanoin privileiju tebe-tebes bainhira ita hetan vizita ida husi líder másimu relijiaun Katólika nian. Hanoin ho vizita sira-ne’e ho bele lori grasa oioin, hanesan grasa ba dame no lori grasa sira kona-ba moris di’ak nian, besik liután ba Igreja. Ne’ebé, esperansa mak ne’e, ba ha’u, nu’udar sarani ida sente orgullu tebe-tebes no Timor-Leste onradu bainhira dala ida tan hetan vizita husi Amu Papa nian,” Nia hateten ba Agência TATOLI iha resintu Parlamentu Nasionál, tersa ne’e.
Nu’udar sarani baibain, nia hato’o mensajen ba maluk sarani hotu aproveita atu bele asiste vizita ida-ne’e ho dame, no iha momentu ne’e fó tempu minutu balun konsentra ho Amu Papa oinsá husu grasa ba Maromak hodi husu pás iha Timor-Leste.
No husu mós matenek no forsa ba líder nasionál sira hotu oinsá lori kontribui di’ak liután ba dezenvolvimentu rai ne’e hodi atinje mehi no objetivu povu nian.
Deputada Bankada Partidu Demokrátiku (PD), Maria Teresa Gusmão, hato’o dejezu ksolok tebes ba Amu Papa ninia vizita husi loron 09 to’o 11 setembru 2024, hodi hanoin hikas fali iha tinan hirak liu-bá bainhira Timor-Leste sei luta ba nia ukun rasik-an Amu Papa João Paulo II vizita Timor-Leste, hodi lori mensajen ida-ne’ebé boot tebe-tebes.
Ho ida-ne’e, nia dehan, juventude timoroan sira partisipa iha funu iha demostrasaun ne’ebé akompaña mós ho orasaun mak Timor-Leste nia independénsia.
“Ita agradese mós ba Maromak, depois indepedénsia Amu Papa Francisco, mai vizita dala ida tan hodi lori mai ita-nia rai kmanek boot grasa oioin no espíritu oioin ba rai ida-ne’e. Atu rai ida-ne’e ho Amu Papa nia vizita bele fó mai ita rai Timor-Leste pás, felisidade, fraternidade no dezenvolvimentu integradu ba povu no komunidade ho relijiaun hotu-hotu ne’ebé iha ne’e,” nia dehan.
Tanba, tuir nia, Amu Papa lori bensaun ida universál, la’ós de’it nu’udar Amu Papa uma kreda Katólika maibé hanesan mós Xefe Estadu Vatikánu nian, tanba ne’e uma kreda ho Governu kaer liman hamutuk lori serbisu susesu ba simu vizita ne’e.
“Espera ita hotu ne’ebé partisipa iha misa ho fuan no laran, hasa’e ba Maromak atu liuhusi Amu Papa nia harohan da’et, ita bele hetan grasa ne’ebé ita hotu presiza. No ba maluk sira ho defisíensia, ferik ho katuas no labarik sira-ne’ebé la mai. Espera katak, ita harohan iha ida-idak nia fatin no uma atu bensaun kmanek ida-ne’e bele to’o ba ita hotu ne’ebé simu Amu Papa iha vizita ne’e,” nia hateten.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Nelson de Sousa
Editór : Cancio Ximenes
