JAKARTA, 04 setembru 2024 (TATOLI) – Papa Francisco banihira hasoru malu ho bispu, padre, madre, diakónu, relijiozu no relijioza, seminarista no katekista sira iha Katedral Nossa Señora Asunsaun, Jakarta, nia husu sira atu sai testemuña ba resurreisaun – moris hias.
Hafoin rona tiha testemuña husi padre ida no madre ida, ho katekista na’in rua (mane ida no feto ida), Santu Padre refleta kedas ba lema eskollida ba ninia viajen apostólika ba Ázia no Pasífiku “Fé, Fraternidade no Kompaisaun.”
“Ha’u hanoin virtude tolu ne’e espresa di’ak loos imi na’in rua nia jornada hanesan Igreza no imi karakter hanesan ema mai ho étnika no kulturalmente variada,” Papa Francisco tenik.
“Nune’e imi luta hela ba unidade no e konvivénsia (moris ka eziste hamutuk) iha dame nia laran,” nia reiteira.
Iha ninia diskursu, Sua Santidade mós ko’alia kona-ba Fé iha ne’ebé mak nia haree Indonézia, nu’udar nasaun boot no nakonu ho rikeza naturál ne’ebé mak refleta prezensa Nai Maromak Nia iha kozmu no mós iha ema nia moris.
Santu Padre dehan laiha rai pedasuk ida iha Indonézia mak la kapaz no nune’e mós ninia ema sira, “Ida-ne’e la’ós prezente husi Nai Maromak, maibé ida ne’e sinál domin Nai Maromak Nian domin ne’ebé rohan-la’ek.
Toka ba Fraternidade Amu Papa empresta espresaun ida husi puízia sékulu-20 ne’ebé hateten, “Sai maun-alin signifika hadomi malu liuhusi rekoñese malu hanesan be’e turuk rua ne’ebé mak turuk lahanesan.”
Nia hateten haburas “Ita-nia fraternidade – valór ne’ebé mak ita anota momoos mak sai belun ba Igreza Indonézia” ne’ebé “signifika simu malu, no rekoñese malu hanesan iha diversidade ida.”
Santu Padre apresia Testemuña husi Madre Rina ne’ebé mak destaka importánsia kona-ba hakuak ema hotu, Papa espera katak la’ós de’it biblia, maibé igreza nia hanorin mós bele traduz ba lian Indonézia.
Papa mós espresa ninia apresiasaun ba testemuña husi Nicholas, katekista ida-ne’ebé mak deskreve ninia misaun hanesan fonte ida hodi halibur ema hotu atu ultrapasa barreira no hakuak diversidade.
Amu Papa mos hato’o kona-ba relasaun besik entre fraternidade no kompaisaun, iha ne’ebé mak la eziste mesak iha asaun karidade “ida-ne’ebé mak dada ema besik ba malu, liu-liu ba sira ne’ebé mak hakarak hakuak mehi no dezeju hodi garante liberdade no justisa ba ema sira ne’ebé mak presiza.”
Santu Padre dehan kompaisaun la’ós frakeza ida, no la’ós kalohan ne’ebé mak taka vizaun verdadeira moris nian, maibé nia dehan kompaisaun ne’e halo ema haree buat hotu husi parte di’ak nian, mak domin Nai Maromak Nian.
Molok atu taka ninia diskursu iha Katedrál Nosa Señora Asunsaun, Papa Francisco konvida bispu, padre, madre, diakónu, relijiozu no relijioza sira, seminarista no katekista sira atu sai testemuña ba ksolok Resurreisaun, no motiva sira atu kontinua sira-nia misaun relijioza ho pozisaun forte iha fé, nakloke aan ba ema hotu iha fraternidade, no hakbesik aan ba malu iha kompaisaun.
Jornalista: Filomeno Martins
Editór: Rafael Ximenes de A. Belo
