DILI, 12 Maiu 2026 (TATOLI)—Prezidente Repúblika, José Ramos-Horta, simu karta felisitasaun husi Prezidente Estadu Unidu Amérika (EUA), Donald J. Trump, ba Aniversáriu Restaurasaun Independénsia RDTL ba da-24 ne’ebé sei selebra iha 20 Maiu 2026.
Iha karta ho data 06 Maiu 2026 ne’ebé entrega husi Embaixada Estadu Unidu iha Díli, Prezidente Trump felisita Timor-Leste ba aniversariu restaurasaun independensia ba da-24 no ninia konkista istórika ba adezaun plena iha Asosiasaun Nasaun Sudeste Aziátiku (ASEAN).
“Bainhira Timor-Leste selebra aniversáriu ba nia Restaurasaun Independénsia iha 20 Maiu, ha’u hato’o ha’u-nia parabéns ba Ita-boot no povu Timor-Leste. Ami mós hato’o parabéns ba Timor-Leste nia adezaun plena iha Asosiasaun Nasaun Sudeste Aziátiku iha tinan kotuk–pasu istóriku ida ne’ebé reflete papel kresimentu husi imi- nia nasaun iha rejiaun. Hein katak imi-nia selebrasaun nasionál sei nakonu ho ksolok,” Prezidente Donald J. Trump iha ninia karta.
Parseria entre Estadu Unidus no Timor-Leste reflete iha sira-nia dedikasaun mútua hodi promove rejiaun Indo-Pasífiku ne’ebé livre no nakloke. Prezidente Trump valoriza progresu ne’ebé nasaun rua alkansa ona liuhusi kooperasaun sira iha defeza, seguransa, asuntu ekonómia no liután.
Prezidente Ramos-Horta hato’o agradesimentu ho laran-kmanek ba Prezidente Donald Trump no ba povu Amerikanu, hodi enkuadra karta ne’e hanesan omenajen ida ba espíritu reziliénsia Timor-oan nian.
“Hodi povu Timor-Leste ne’ebé luta no hafolin ami-nia independénsia, ha’u agradese ba Prezidente Donald J. Trump ba nia karta felisitasaun ho laran-kmanek. Ninia rekoñesimentu ba ita-nia adezaun ba ASEAN la’ós de’it rekoñesimentu ida ba ita-nia Governu nia esforsu, maibé ba sidadaun timoroan ida-idak ne’ebé fiar katak ita-nia nasaun bele okupa nia fatin ne’ebé loos iha família nasaun sira. Estadu Unidu hamutuk ho ita durante luta no pás, no mensajen ida-ne’e reafirma amizade ne’ebé dura,” Prezidente Ramos-Horta dehan.
Ba povu Timor-Leste, rekoñesimentu ida-ne’e mai iha momentu profundu orgullu nasionál. Hafoin harii hikas nasaun husi ahi-kudesan konflitu nian, Timor-Leste agora hamriik nu’udar membru soberanu no respeitadu iha komunidade internasionál, ho adezaun ba ASEAN ne’ebé reprezenta aspirasaun durante dékada barak ne’ebé finalmente konkretiza.
TATOLI
