DILI, 04 setembru 2024 (TATOLI) – Governu liuhusi Reuniaun Konsellu Ministru (KM),kuarta ne’e,iha Palásiu Governu Dili, diskute no aprova kurríkulu báziku nasionál ba sikulu datoluk Ensinu Báziku nian ne’ebé abranje tinan 7.º, 8.º no 9.º eskolaridade.
Projetu dekretu-lei ne’e aprejenta husi Ministra Edukasaun, Dulce de Jesus Soares.
“Kurríkulu ida-ne’e, ne’ebé troka versaun 2011 nian, hakarak atu unifika no moderniza ensinu báziku, hodi fornese edukasaun ho kualidade ne’ebé aliña ho nesesidade kontemporánea sira,” tenik iha nota ne’ebé Agência TATOLI asesu husi portál Governu.
Objetivu prinsipál sira inklui dezenvolvimentu koñesimentu sientífiku no linguístiku, aleinde hametin abilidade sira hanesan pensamentu analítiku-krítiku, kriatividade, komunikasaun no apresiasaun ba tradisaun kulturál sira.
Notavel maka introdusaun husi dixiplina “Fraternidade Umana, Morál no Étika”, inspiradu hosi ensinu sira husi Papa Francisco no Grande Imam hosi Al-Azhar, hodi promove dame no konvivénsia armonioza.
Implementasaun kurríkulu ida-ne’e sei promove abordajen inkluzivu ida ba diversidade, nune’e mós sei introdús elementu inovativu sira hanesan alfabetizasaun dijitál no bem-estar fíziku no mentál. Eskola sira sei iha autonomia atu adapta kurríkulu tuir karakterístika rejionál sira, naran katak sira respeita prinsípiu orientadór sira.
Iha intensaun atu estudante sira, bainhira kompleta ona siklu ida-ne’e, sei bele partisipa ho ativu iha sosiedade, ho koñesimentu sientífiku ne’ebé avansadu, enkuantu prezerva tradisaun sira ne’ebé forma identidade timoroan nian no dezenvolve pensamentu krítiku hodi rezolve problema sira no halo dixernimentu no responsabilidade ne’ebé informadu.
Jornalista: Hortencio Sanchez
Editór: Florencio Miranda Ximenes
