DILI, 04 setembru 2024 (TATOLI)—Dioseze Atambua iha Timor Osidentál no Arkidioseze Kupang iha Indonézia rejista ona peregrinu hamutuk 947 sei partisipa misa ne’ebé prezide husi Papa Francisco iha Tasi-tolu, iha loron 10 setembru.
“Bazeia ba relatóriu husi enkontru koordenasaun foin lalais ne’e, totál partisipante peregrinasaun husi Dioseze rua ne’e hamutuk na’in-947, ho detallu, ema na’in-385 husi Dioseze Kupang no ema na’in-562 husi Dioseze Atambua, ne’ebé preparadu iha tempu badak sei ba Timor-Leste hodi tuir misa hamutuk ho Papa Francisco iha Tasi-tolu,” Sekretáriu Jerál Sentru Pastorál Dioseze Atambua, Yosef M. L, hateten, via telefónika, kuarta ne’e.
Númeru peregrinu ne’e kompostu husi bispu, padre, madre no sarani katólika ho idade entre 30 to’o 60.
Notísia relevante : Dioseze Atambua rejista partisipante 646 sei tuir misa Papa Francisco iha Tasi-tolu
Iha sorin seluk, Bispu Dioseze Atambua, Monseñor Dominikus Saku, informa, Dioseze Atambua antes ne’e halo ona sosialiasaun, nune’e husu atu sarani sira rejisu reprezenta kada dioseze na’in-80 hodi partisipa misa prezide husi Papa Francisco iha Jakarta, maibé laiha ema ida mak rejistu.
“Ami deskonfia maioria sarani prefere liu ba Timor-Leste tanba Amu Papa mós sei vizita. Bazeia ba ida-ne’e ami halo komunikasaun ho Bispu sira iha Timor. Ami simu informasaun katak bele no fó oportunidade ba sarani sira husi ne’e ba tuir misa ho kuota bele to’o 10.000,” nia tenik.
Hafoin komunika ho Kardeál Virgílio, Dioseze Atambua hasai kedas karta ida hodi hahú rejista ema atu partisipa iha misa solene.
Jornalista : Arminda Fonseca
Editora : Julia Chatarina
