DILI, 05 Setembru 2024 (TATOLI) – Kámara Komérsiu Indústria Timor-Leste (CCI-TL, sigla portugés) lansa, ohin, foos ho marka Mana Boot, ne’ebé tuir planu sei fa’an iha merkadu iha tinan oin.
Foos lokál ne’e lansa husi Arsebispu Arkidioseze Metropolitana Dili, Dom Virgílio Kardeál do Carmo da Silva, Primeiru-Ministru, Kay Rala Xanana Gusmão, no Ministru Agrikultura, Pekuária, Peska no Floresta, Marcos da Cruz.
Foos ne’e mai husi rezultadu programa demo plot ne’ebé CCI-TL implementa hamutuk ho agrikultór sira atu hasa’e produsaun ai-han iha rai-laran no hamenus importasaun, ne’ebé hahú iha 2023.
Programa ne’e liuhusi kooperasaun ne’ebé envolve Kámara Komérsiu no Indústria Indónezia no PT. Petrosida Gresik, liuhusi rezultadu enkontru ASEAN ne’ebé akontese iha Labuan Bajo iha tinan kotuk, bainhira Prezidente CCI-TL partisipa mós iha eventu ne’e.
Primeiru-Ministru, Xanana Gusmão, parabeniza CCI-TL tanba ho sira-nia esforsu tomak konsege organiza ona komunidade agrikultór sira iha munisípiu hodi bele halo produsaun foos lokál.
Tanba ne’e, nia husu ba setór privadu sira atu kontinua apoia CCI-TL hodi dezenvolve di’ak liután ekonomia iha rai-laran no hasa’e produsaun foos, inklui Ministériu Agrikultura bele reforsa nia planu atu hasa’e produsaun agríkola sira.
“Parabéns ba CCI-TL. Ida ne’e hanesan ezemplu ida. Tan ne’e, husu ba Ministériu Agrikultura, bainhira CCI-TL halo ona ida ne’e, ministériu tenke halo liután, la’ós atu halo kompetisaun, maibé bele ajuda atu ita bele la’o liután ba oin”, nia dehan.
Xefe Governu ne’e mós solisita ba setór kooperativa atu labele tuur de’it, maibé tenke dudu nafatin setór ekonomia ne’e, hodi fó kbiit ba CCI-TL atu hanoin hodi halo buat ruma atu ajuda setór privadu sira dezenvolve aan liután.
“Tanba Governu mós hanoin ona atu harii Banku Dezenvolvimentu ida atu fó kréditu ba mikro, médiu no pequena empreza hodi ajuda setór privadu sira la’ós atu hatama osan ba Estadu, maibé atu dudu no hadi’a ekonomia iha rai-laran”, salienta.
Iha biban ida ne’e, Xefe Ezekutivu mós hato’o obrigadu ba Embaixadór Indonézia iha Timor-Leste, Okto Dorinus Manik no reprezentante sira husi empreza Petrosida no Petrokimia ba apoiu ne’ebé sira fó ona ba Timor-Leste, liuhusi kooperasaun ne’ebé halo ho CCI-TL.
Primeiru-ministru dehan Timor-Leste sei sai membru ASEAN no ida ne’e oportunidade di’ak tebes atu loke odamatan ida luan hodi bele kontinua hala’o kooperasaun ho nasaun sira iha ASEAN, inklui Indonézia.
Xanana admite katak Timor-Leste sei sai nasaun membru ASEAN iha futuru, maibé sei labele halo kompetisaun ho Indonézia. Nia halo komparasaun Timor-Leste labele kompete ho Indonézia bainhira haree husi produsaun agríkola. “Bainhira Timor-Leste foin hanoin atu prodús foos kilo ida, maibé Indonézia prodús ona foos tonelada 10”, salienta.
Maske nune’e, Xanan dehan Timor-Leste lakohi sai nasaun ida ne’ebé dependénsia ba produtu importasaun, tanba Governu hakarak dudu populasaun sira iha munisípiu no área rurál atu sente katak independénsia ne’e iha duni valór ba ema hotu.
Tuir Xefe Ezekutivu, Timor-Leste sei iha hela prosesu konstrusaun Estadu hodi serví sosiedade di’ak liu ho serbisu hamutuk hodi halo nasaun ne’e independente no foka liu ba dezenvolvimentu ekonómiku.
Tanba ne’e, nia husu ba setór privadu sira atu hamutuk dudu no apoia nafatin CCI-TL atu kontinua tau atensaun hodi dezenvolve ekonomia iha país.
Apoiu ne’ebé CCI-TL halo ne’e la’ós iha foos de’it, maibé bele haree mós iha setór sira seluk. Tanba ne’e, Governu sei fó konfiansa ba setór privadu sira atu serbisu hamutuk hodi lori ekonomia rai ida ne’e ba di’ak liu.
Nune’e mós, Prezidente CCI-TL, Jorge Serrano, esplika katak iha projetu faze dahuluk ne’e CCI-TL rekruta ona joven na’in-13 hodi tuir formasaun agríkola iha Manatuto, ne’ebé foka liu ba kultura nasaun nian hodi haree ba komunidade agrikultór sira, kuantidade no kualidade ba produsaun foos “Mana Boot”.
“Ne’e mak marka ne’ebé ita lansa ona no, tuir planu, tinan oin bele tama ona bá merkadu Timor-Leste. Ne’e la fásil no ami esforsu atu haluan natar sira ne’ebé sei abandona. Ita fiar katak iha 2026 bele responde ba nesesidade boot sira iha nasaun ne’e no iha 2026 ita la presiza tan importasaun [foo] husi nasaun seluk”, prezidente ne’e espera.
Tuir Jorge Serrano, foos Mana Boot mai ho nia padraun kualidade no kuantidade entre kilógrama 10, 15, 20, no 25. “Lansamentu foos Mana Boot ne’e la’ós buat ida ne’ebé boot. Ami espera katak ida-ne’e bele motiva ami-nia agrikultór sira iha Timor-Leste. Ami sei haluan ita-nia natar sira ne’ebé abandona husi ektare 30.000 ne’e, atu ita garante nesesidade iha rai-laran”, nia promete.
Arsebispo Arkidioseze Metropolitana Dili, Dom Virgilio Kardeál do Carmo da Silva, iha lansamentu foos ne’e dehan nia konsidera tebes apoiu husi CCI-TL nian, tanba bele ona hola parte iha preparasaun espesiál iha apoiu nesesidade ai-han ba peregrinu sira hodi simu Papa Francisco mai Timor-Leste.
“Ohin, foin halo lansamentu ba foos ne’e, sira la buka uluk osan, maibé sira [CCI-TL] oferese ho gratuita foos tonelada 40 atu apoiu peregrinu sira hodi bele partisipa másima iha vizita Papa Francisco nian iha Timor-Leste”, dehan.
Notísia relevante:
CCI-TL no parseiru fó apoiu finanseiru-materiál ba igreja katólika
Jornalista: Tomé Amado
Editora: Maria Auxiliadora
