DILI, 05 setembru 2024 (TATOLI)—Eletricidade de Timor-Leste, Empreza Públika (EDTL, E.P) garante katak ahi sei la mate durante Papa Francisco nia vizita Apostólika mai Timor-Leste iha loron 09 to’o 11 setembru 2024.
Komisáriu Ezekutivu Servisu Tékniku no Vogál Konsellu Administrasaun iha EDTL, E.P, Latino Jerónimo, hateten, instituisaun ne’e nia knaar mak fornese ahi no garante ahi bele lakan durante 24 oras, tantu iha eventu kiik ka boot.
“Relasiona ho Papa nia vizita, ita halo ona preparasaun másimu sira hanesan hahú husi Tasi-tolu, iha ne’ebá instalasaun ligadu ba liña rede eletrisidade média tensaun, baixu tensaun ne’e ligadu tiha ona, instala mós transformadór iha ne’ebá nomós ita tau tan jeradór rezerva rua hodi ajuda karik mosu fallansu ruma,” Latino Jerónimo, informa ba Agência Tatoli iha ninia knaar fatin, EDTL, E.P Caicoli, kinta ne’e.
Notísia relevante : EDTL, E.P husu kliente sosa pulsa eletrisidade molok Papa Francisco mai vizita Timor
Preparasaun seluk mak iha fatin deskansa Amu Papa iha Nunsiatura Apostólika iha Faról-Dili.
“EDTL, E.P horiseik lori tan jeradór rezerva ida ba ne’ebá, maski hodi reforsa jeradór rezerva Nunsiatura nian hodi ajuda ahi mate bele utiliza lalais jeradór sira ne’e. Ita mós haree fatin importante hotu ne’ebé Papa sei vizita ne’e, ita tau hotu jeradór rezerva hanesan, Madre ALMA sira iha ne’ebá, liña eletrisidade ligadu hela maibé ita mós sei rezerva hela jeradór ida hodi apoiu sira,” nia akresenta.
Aleinde ne’e, ekipa téknika sira observa ona liña instalasaun iha Igreja Katedrál, Vila-Verde, ne’ebé iha ona jeradór rezerva, enkuantu ba Sentru Konvensaun Dili (CCD, sigla portugés) iha ona ligasaun rede elétrika inklui jeradór rezerva.
“Ba Sekretariadu Komisaun Organizadora sira nian agora ita prepara hela, ba bainaka sira ne’ebé akompaña ho Papa ne’ebé mai sei hela iha Otél Timor no Otél Hilton, haree liña di’ak hela no otél rua ne’e mós iha rasik jeradór rezerva,” nia tenik.
Aleinde ne’e, ekipa EDTL, E.P halo ona instalasaun liña eletrisidade iha peregrinu sira nia fatin konsentrasaun iha Hera, Casnafar, Tibar no fatin seluk seluk tan, maibé la konsege tau jeradór rezerva tanba la to’o.
“Ami garante ahi la mate no karik mate mós ekipa sei tau-matan lalais nune’e ahi bele rekupera lalais. Ita mós halo ona interventasaun ba jeradór rezerva sira iha Palásiu Prezidensiál Bairru-Pité, ne’e ami garante ahi la mate tanba ami mós kria ekipa task force hodi halo intervensaun ba ahi durante Papa nia vizita,” Latino esplika.
Nia dehan, dala-ruma ahi mate ne’e tanba iha razaun balun mak hanesan kestaun natureza no kestaun téknika, maibé daudaun parte tékniku halo esforsu hodi garante ahi labele mate.
Jornalista : Arminda Fonseca
Editora : Julia Chatarina
