DILI, 05 setembru 2024 (TATOLI)—Eletricidade de Timor-Leste, Empreza Públika (EDTL, E.P) husu ba kliente atu sosa pulsa ba kontadór pré-pagu molok Papa Francisco nia vizita mai Timor-Leste.
Komisáriu Ezekutivu Servisu Tékniku no Vogál Konsellu Administrasaun iha EDTL, E.P, Latino Jerónimo, hateten, durante vizita Apostóliku, sentru venda pulsa eletrisidade sira inklui sentrál Caicoli kontinua loke, maibé Timor-Leste dependénsia konsumu internet husi operadór tolu hanesan Telemor, Telkomcel no Timor Telecom, tanba ne’e Governu foti desizaun hasa’e hotu kapasidade internet hodi konsentra ba eventu boot ne’e.
“Iha nafatin internet mai EDTL, E.P maibé atu imprime lalais surat-tahan pulsa ahi nian atu sai ne’e prosesu kleur. Tanba ita hotu hatene eventu boot ida-ne’e, ita-nia Estadu foti desizaun tenke foku ba eventu ne’e atu transmisaun sira la’o di’ak, lais no kualidade, nune’e ita tenke apoiu ideia sira ne’e tanba eventu ne’e boot ba nasaun ne’ebé ita-nia na’i ulun sira koordena ho operadór telekomunikasaun sira hasa’e kapasidade internet ba hotu eventu ne’e atu ema asesu atividade hotu liuhusi online ho di’ak, mak ita fó hanoin kliente sira ne’ebé mak presiza sosa pulsa eletrisidade sosa antes di’ak liu,” Latino Jerónimo informa ba Agência Tatoli, iha ninia knaar fatin, Caicoli, kinta ne’e.
Notísia relevante : EDTL, E.P rekolla reseita millaun $24,5 durante fulan-neen
Nune’e, desizaun hotu kona-ba liña internet ne’e iha Governu nia-liman.
Enkuantu, postu venda ne’ebé daudaun eziste ona iha territóriu hamutuk 463, hahú husi tinan 2020 to’o maiu 2024.
Iha sorin seluk, EDTL, E.P rekolla ona reseita $37.197.388,61 ba kofre Estadu, hahú husi janeiru to’o agostu.
Reseita sira ne’e mai husi atividade rutina sira hanesan fa’an enerjia hahú husu pós-pago no pré-pago, ninia reseita janeiru to’o jullu pós pago hamutuk $13.909.620,89, ba pré-pago hahú husi janeiru to’o agostu rekolla hamutuk $22.660.287,91.
Atividade seluk mak liagaun foun ho nia reseita hamutuk $232.740,75, hahú janeiru to’o jullu, inklui atividade sira seluk hamutuk $394.739,06.
EDTL, E.P iha tinan 2023 ultrapasa projesaun ne’ebé Ministériu Finansa fó hodi rekolla reseita ho montante millaun $52, maibé empreza públika ne’e konsege rekolla liu projesaun ho totál reseita $54.055.058,99
Nune’e, projesaun reseita ba tinan 2024 tenke rekolla totál millaun $60, ne’ebé sei kolleta husi pré-pago, pós-pago, alugue poste no servisu seluk.
Jornalista : Arminda Fonseca
Editora : Julia Chatarina
