EDTL, E.P rekolla reseita millaun $24,5 durante fulan-neen
DILI, 25 jullu 2023 (TATOLI)—Eletricidade de Timor-Leste, Empreza Públika (EDTL, E.P) konsege rekolla reseita millaun $24,5 ba kofre Estadu durante fulan-neen, hahú hosi janeiru to’o juñu 2023.
“EDTL, E.P rekolla reseita hosi atividade hanesan fa’an pulsa eletrisidade, monta kontadór pre-pagu, ema aluga ai-riin no seluk tan. Enkuantu meta EDTL, E.P nian ba tinan ne’e, iha esperansa boot sei rekolla reseita millaun $60 ba kofre Estadu,” refere relatóriu dezempeñu servisu ne’ebé Agência Tatoli asesu, tersa ne’e.
Notísia relevante : EDTL, E.P rekolla reseita millaun $12,9 iha trimestre dahuluk
Progresu Programa Eletrifikasaun Nasionál (PEN) daudaun ne’e suku sira ne’ebé asesu ona liña eletrisidadade atinje ona 94% no benefisia ona uma-kain 7.945.
Aleinde ne’e, servisu konjuntu entre tékniku EDTL, E.P no komunidade implementa ona Programa Eletrifikasaun Komunitáriu (PEK) ba aldeia 93, ne’ebé hosi númeru ne’e aldeia 47 mak asesu ona no seluk sei iha prosesu finalizasaun.
Enkuantu, kona-ba programa distribuisaun solár panél ba komunidade área remota hamutuk 1.091 kuaze konklui ona.
Jornalista : Arminda Fonseca
Editora : Julia Chatarina
