DILI, 05 setembru 2024 (TATOLI)– Sarani Katólika husi Munisípiu Dili kontinua forma to’o kalan ne’e hodi rejistu tanba hakarak partisipa Misa Solene ne’ebé prezide direta husi Sua Santidade Papa Francisco, iha Tasi-Tolu, iha loron 10 setembru.
Liu husi observasaun ne’ebé Jornalista Ajénsia Tatoli halo iha tereñu nota katak sarani sira iha Munisípiu Dili liuliu iha Parókia São José Aimutin, Parókia Maria Auxiliadora Comoro no Parokia Santo António Motael kontinua halo rejistu maske oras hatudu kalan ona.
Administradór Parokia São José Aimutin, Padre Helio Castro Alves hateten igreja foti desizaun hodi kontinua rejistu tanba hare’e ba antuziasmu husi sarani sira nian.
“Ita hare’e ba situasuan agora to’o ona tuku 20:00 ba 21:00, maibe ema sei iha, ita sei esforsu nafatin atu sarani sira hotu bele rejistu. Tanba ita haree ba antuziasmu sarani sira nian maka’as tebes, ita mós haree ba sira nia esforsu forma naruk, balun mai hamlaha maibé sira nafatin hakarak rejistu,” dehan Padre Helio ba Tatoli iha Parokia Aimutin, kinta kalan ne’e.
Padre ne’e haktuir rejistu ba misa hamutuk ho Papa Francisco nian loke ona hahú loron 15 jullu tinan ne’e no planu deside hodi taka iha 29 agustu, maibe sekretariadu nivel altu husi parte igreja rasik husu atu kontinua to’o loron 05 setembru 2024.
Parokia deside hodi mantein rejistu to’o ema hotu ne’ebé tuir formatura bele hetan kartaun rejistu hodi hetan oportunidade hanesan ho sarani seluk.
“Ita haree ne’e mak komisaun Igreja nian to’o kalan boot mós nafatin, mas aban la iha ona, ita hein to’o ema la antri ona mak foin taka, horiseik ita taka kuaze tuku 23:00, kalan”, Amu afirma.
Saserdote ne’e mòs informa iha loron 02 setembru Parokia São José Aimutin hetan distribuisaun farda hamutuk 11.000, maibé konsege fahe hotu, nune’e komisaun husi parokia halo hikas pedidu atu fornese tan farda 4.000 hodi fahe ba sarani sira.
“Farda ita simu 11.000 ne’e hotu ona no ohin dader ita foti tan 4.000 se agora mak fahe hotu entaun hotu ona, se ita hare ba farda sei iha mak ita sei kontinua fahe, maibé ba tau naran aban laiha ona tanba komisaun dehan termina to’o loron 05 setembru de’it,” dehan Padre Helio.
Iha fatin hanesan, Sarani husi Bairru Faularan, Tomé dos Santos sentre kolen ho formatura ne’ebé naruk maibé hakarak pasénsia hodi bele rejistu no hetan oportunidade ba misa besik liu Papa Francisco.
“Ami mai tuku 5 ne’e kedas mak agora sei forma hela ne’e, kolen ne’e loos duni maibé ita hakarak misa besik iha oin ne’e ita tenke pasensia. Durante ne’e ami rona hela maibé atu mai rejistu okupadu, ohin hein too kalan mos diak hela,” sarani ne’e haktuir.
Tuir dadus husi Parokia São José Aimutin to’o tuku 21:00 konsege rejistu ona ema hamutuk 14.241. Enkuantu dadus ba parokia sanulu iha munisípiu Dili hamutuk 86.512.
Notísia relevante:Papa prezide misa iha lian Portugés-orasaun universál lee iha dialeitu 6
Jornalista: Cidalia Fátima
Editór: Florencio Miranda Ximenes
