Papa vizita “Túnel Amizade” ne’ebé konekta Mesquita “Istiqlal” no Katedrál Nossa Senhora Maria Assunção
JAKARTA, 05 setembru 2024 (TATOLI) – Papa Francisco, iha ajenda primeiru husi loron datoluk iha Jakarta, Santu Padre vizita “Túnel da Amizade” ne’ebé konekta Mesquita “Istiqlal” no Igreza Katedrál Nossa Senhora Maria Assunção.
Iha vizita ida ne’e, Santu Padre simu hosi Grande Imã Indonézia, Nasarudin Umar ne’ebé mak harii Organizasaun Inter-relijioza Indonezia, no akompaña husi lider relijioza husi relijiaun oioin.
Túnel Amizade ne’e konekta, Meskita Istiqlal nu’udar meskita boot liu iha Sudezte Aziátiku no Igreza Katedral Nossa Senhora Maria Assunção ne’ebé mak boot liu iha Indonézia.
Durante seremónia ben-vindu, komunidade haksolok tebes hodi hananu knananuk furak iha lian Indonézia dehan “Selamat Datang di Masjid Istiqlal, Penuh Damai, Penuh Kasih, Penuh Kasih (Bem Vindo mai Meskita “Istiqlal”, Nakonu ho Dame, Nakonu ho Domin, Nakonu ho Domin).
Amu Papa kongratula partu hotu ne’ebé mak hola parte iha konstrusaun túnel referidu, hodi hatete katak Túnel Amizade ne’e sai fatin ba diálogu no enkontru entre fiar-na’in husi relijiaun rua.
“Bainhira ita hanoin kona ba túnel ida, fasil liu ba ita atu hanoin katak túnel ne’e dalan nakukun ida. Dalan ida ne’ebé mak bele halo ita tauk, liuliu bainhira ita la’o mesak. Maibé, túnel ida-ne’e diferente, tanba buat hotu iha ne’e naroman. Ha’u hakrak hatete katak imi mak ahi ne’ebé fó naroman ba túnel ida ne’e no imi halo ida ne’e liuhusi imi-nia amizade, husi armonia ne’ebé imi kuda, husi imi-nia apoiu malu, no husi imi-nia jornada hamutuk ne’ebé mak lori imi ba dalan ikus ida nakonu ho naroman,” Papa Francisco tenik iha nia diskursu iha Meskita Istiqlal, Jakarta, kinta ne’e.
Sua Santidade husu ba fiar nain husi relijiaun oioin atu ezerse papél ida hodi fo tulun ema hotu hakat liu túnel moris nian ho matan hateke ba naroman ida, “nune’e, iha jornada ikus ida, ita bele koñese maluk hirak ne’ebé mak la’o hamutuk ho ita, liuliu maun-alin sira ne’ebé mak ita moris hamutuk no fo apoiu ba malu.”
Papa fó hanoin katak iha mundu ohin loron ne’ebé mak nakonu ho dezafiu oioin. “Ita hasoru ho sinál fraternidade. Klaru, simu ema seluk, respeita sira-nia identidade, tanba fraternidade dudu sira iha jornada komún ida nakonu ho amizade hodi hakat ba naroman ida.”
Papa hato’o ninia obrigadu uain ba ema sira ne’ebé mak serbisu ho konviksaun hodi, “Ita hotu moris iha armonia no dame no hatene katak mundu persiza liu tan fraternindade.”
“Ha’u espera ita-nia komunidade sei nakloke liután ba diálogu inter-relijioza no sai símbolu ne’ebé karakteriza Inonezia nu’udar nasaun ne’ebé moris iha dame nia laran.”
“Ha’u reza ba Maromak, Kriatura husi buat hotu atu fó tulun ema hotu ne’ebé mak sei hakat liu túnel ida ne’e nakonu ho espiritu amizade, armonia no fraternidade.”
Hafoin hakotu ninia diskursu kona-ba Túnel Amizade, Papa Francisco foti liman loos hodi dehan “Maromak Haraik Bensaun Ba Imi Hotu”!
Iha ninia intervensaun, Nasarudin Umar hateten Túnel Maizade harii husi Governu Indonézia, iha Prezidente atual, Joko Widodo nia ukun, hodi kria relasaun di’ak entre fiar-na’in Musulmanu no Katóliku. “Fiar nain husi parte rua bele uza túnel ne’e hamutuk.”
“Iha túnel nia laran, nakonu ho paisjen furak ne’ebé mak hatudu símbolu kooperasaun di’ak entre fiar-na’in Musulmanu no Katóliku. Fatin ne’e sei uza ba enkontru entre fiar-na’in husi relijiaun oioin,” Grande Imã ne’e haktuir.
Nia espresa dejezu boot ho prezensa túnel ne’e bele sai fonte ida la’ós de’it konekta fiar-na’in Musulmanu no Katóliku, maibé sai fonte ida ne’ebé bele halibur ema hotu husi relijiaun oioin.
Hafoin hakotu ninia intervensaun badak, Nasarudin Umar haruuk hodi hakuak Papa Francisco ho espresaun hamnasa no amigavel.
Entretantu, túnel ho naruk 28.3 metru no luan 4.1 metru ne’e harii husi Governu Indonézia iha tinan-2020 nu’udar símbolu armonia relijiozu.
Iha dalan ba túnel ne’e, tantu komunidade Musulmana no Katólika hamriik ho entusiazmu boot hodi hein santu padre ho hiit liman rua, balun lolo-liman hakarak kumprimenta Amu Papa, enkuantu balun fali hakarak hasai foto ho Santu Padre.
Amu Papa hatudu nafatin ninia jestu umilde hodi kumprimenta ema hotu hamriik iha dalan-ninin ho hamnasa no foti liman loos.
Hafoin husik hela Mesquita Istiqlal, iha dalan nafatin nakonu ho fiar-na’in oioin duni tuir Papa hodi hasai foto no selfie, enkuantu Militar no Polísia Indonézia esforsu maka’as atu satan vizitante sira labele rabat liu ba transporte ne’ebé mak tula Amu Papa.
Notísia relevante:Amu Papa hakarak ‘relijiozu’ Indonézia sai testemuña ba Resurreisaun
Jornalista: Filomeno Martins
Editór: Rafael Ximenes de A. Belo
