DILI, 05 setembru 2024 (TATOLI)–Prezidente Repúblika (PR), José Ramos Horta, akompaña husi Primeiru-Ministru (PM), Kay Rala Xanana Gusmão, Reprezentante Santa Sé iha Timor-Leste, Marco Sprizzi, Kardeál Dom Virgílio do Carmo da Silva, kinta ne’e, inaugura salaun Xina (foun) no salaun Nobre Papa Francisco, iha resintu Palásiu Prezidensiál, Bairru-Pité.
PR Horta, hateten, Governu tau ona orsamentu atubele aumenta salaun ne’e, nune’e bainhira Papa Francisco halo reuniaun iha loron 09 setembru, bele akomoda ema barak liu.
“Enkontru bilaterál ho ha’u, Sekretáriu Estadu Vatikanu ne’ebé ekivalente ba Primeiru-Ministru enkontru ho Primeiru-Ministru depois Amu Papa Francisco hakat ba salaun ne’e. Ba ha’u, bainhira planu ba salaun ne’e ha’u hateten tenke mós sai hanesan galeria ida atu loke ba públiku, entaun ha’u hanoin sesta to’o domingu galeria ne’e lokál ba públiku, nune’e ema hakarak mai vizita haree ne’e hanesan halo ansi oituan, depois sei haree,” Xefe Estadu hato’o iha ámbitu inaugurasaun infraestrutura, iha resintu Palásiu Prezidensiál, Bairru-Pité, kinta ne’e.
Aleinde ne’e, iha mós jardín kiik ida ba komunidade ne’ebé hakarak la’o halimar iha resintu Palásiu Prezidensiál.
“Mini jardín iha ne’e foin mak hahú depois sei aumenta, ne’e apoiu husi Prezidente Xina, sira fó kedas resposta pozitivu semana ne’e mai, ekipa Xina mai ona atu halo jardín boot iha Palásiu Prezidensiál atu benifisia ita-nia sidade, atu família sira bele mai pasiar iha jardín ho labarik sira iha Palásiu Prezidensiál no iha Palásiu Lahane. Hanesan ohin Monseñor ko’alia ne’e ideia di’ak ida, tenke hanesan ne’e hatudu kristianianizmu iha mundu hamutuk ho budizmu, konfuzismu Xina nian hanesan hatudu fraternidade,” PR akresenta.
Notísia relevante : Xefe Estadu louva Governu halo preparasaun di’ak simu Papa Francisco
Salaun ne’e hanaran salaun Xina no ida foun ne’e halo ho Governu nia orsamentu rasik, enkuantu edifísiu Palásiu Prezidensiál ne’e 100% husi orsamentu Xina nian.
“Obra reabilitasaun boot ita-nia orsamentu 100%, kompañia Xina mak simu kontratu, salaun foun ne’e salaun Nobre Papa Francisco. Tanba ne’e, ha’u hato’o ha’u-nia agradesimentu ba ema hotu ne’ebé kontribui ona atu ramata projetu ne’e. Primeiru ba Primeiru-Ministru, Kay Rala Xanana Gusmão, atu hetan apoiu no aloka rekursu finanseiru ne’ebé presiza hamutuk $1.517.696, ne’ebé permite atu ramata projetu ne’e iha prazu loron-157 nia laran. Ha’u mós hakarak agradese ba Grupu Konstrusaun Shanghai (SCG), ita-boot nia abilidade téknika, jestaun tempu ne’ebé efisiente no rezolve dezafiu lojístiku ne’e importante tebes atu ita bele inaugura fatin renovadu ne’e ohin,” PR dehan.
Xefe Estadu konsidera, kolaborasaun ne’ebé simu husi Nunsiasaun Apostólika, liu-liu husi Monseñor Marco Sprizzi ne’e ninia folin boot tebes.
“Protokolu ne’e fó dalan no apoiu beibeik ba ita atu asegura katak Palásiu ne’e prontu atu simu ninia apóstolu Francisco, ne’ebé sei hasoru malu ho autoridade, sosiedade sivíl no korpu diplomatiku iha loron 09 setembru, iha sala multifunsionál foun ne’ebé ita sei bolu nu’udar Sala Sua Santidade Papa Francisco,” nia dehan.
PR agradese mós ba funsionáriu sira ne’ebé dedika-an hodi finaliza dekorasaun ida-ne’e.
“Ha’u labele falla atu rekoñese no agradese ba staff, voluntáriu no kolaborador sira ne’ebé, iha semana hirak foin lalais ne’e, dedika sira-nia an ho dedikasaun boot ba serbisu detallu no dekorasaun. Ita-boot sira transforma fatin ne’e ba fatin ida-ne’ebé kontente no kontente, la’ós de’it atu simu ninia santuidade, maibé mós dignitariu nasionál no internasionál hotu-hotu ne’ebé vizita ita-boot sira-nia rai,” nia katak.
Falta imajen líder nasionál balun
Tenente-Jenerál Reformadu, Lere Anan Timur, hateten obra ne’e halo kleur ona maibé montajen fotografia no dezeñu ne’e foin mak tau.
“Ida-ne’e ita bele dehan katak ultima hora, entre foto sira ne’e ita bele haree katak la kompleta maibé sei kompleta. Pur ezemplu, katuas Feras seidauk iha, mas ami haree ona atu taka katuas Feras ninian,” Lere dehan.
Nia nota montajen ne’e depende mós ba espasu, bele la tau iha salaun foun ne’e maibé bele tau iha fatin seluk.
“Pur ezemplu, katuas Marí Alkatiri seidauk tau, mas sei tau, agora labele mane de’it, tenke iha mós feto. La’ós mane mak halo funu de’it maibé feto mós iha ai-laran durante tinan 24 mós iha na’in-lima, entaun husi na’in-lima ne’e pelumenus na’in ida-rua tenke reprezenta sira. Fotografia feto iha ne’e seidauk kompletu duni,” nia katak.
Iha fatin ne’e sei tau fotografia saudoza na’in-rua hanesan Billesa no Francelina. Billesa husi parte sentru nian.
“Francelina husi parte Leste no rejiaun nian, nia moris iha ai-laran, kaben iha ai-laran, mak fila mai sidade. Ha’u hanoin katak sira ne’e líder nasionál no sira rezisténsia halo funu, iha frente armada, frente polítika no frente klandestina. Sira ne’e nia reprezenta,” Lere haktuir.
Tenente-Jenerál Reformadu nota mós katak iha fotografia husi líder balun laiha.
“Lú-Olo nia foto iha ne’ebá ne’e nu’udar reprezenta Prezidente Repúblika, agora Marí Alkatiri mak seiduak iha. Ami ne’e reprezenta ami-nia maluk sira-ne’ebé mak mate ona, ami-nia maluk ne’ebé terus. Labele espekula no politiza,” nia katak.
Liga ho kestaun ne’e, Prezidente Repúblika, José Ramos Horta, klarifika fotografia sira ne’e reprezentativu.
“Kritériu mak ne’e de’it, eis Prezidente Repúblika sira, Primeiru-Ministru atuál mak iha ne’ebá, eis Primeiru-Ministru la tama, eis Prezidente Repúblika tama, istória haree iha ne’ebá ne’e hahú kedas Avo Francisco Xavier Amaral, Nicolau Lobato, depois eroi sira luta armada balun mate tiha ona, balun sei moris,” nia akresenta.
Nia rekoñese, falta líder balun nia fotografia tanba ekipa téknika serbisu aselera.
“Ha’u hein naran maibé ha’u de’it sira halo parte úniku luta armada no tempu kle’an, purtantu imajen líder balun iha ona salaun tiha ona, maibé sei hein tan naran ruma ne’ebé ha’u hein konfirmasaun husi sira ne’ebé hatene hanesan Jenerál Lere Anan Timur, depois sei tau. Ohin kedas tau feto rua nia imajen iha salaun ne’e tanba imajen ne’e iha tiha ona, horisehik komesa halo balun, mas orsida lorokraik hanoin tau ona feto rua ne’e nia imajen iha salaun ne’e,” Xefe Estadu esplika.
Kona-ba fotografia Lú-Olo nian iha salaun Xina, PR Horta dehan la’e, Lú-Olo la tama, nia tama nu’udar antigu Xefe Estadu iha ne’ebá.
Fotografia ne’ebé iha salaun Xina mak hanesan Dom Martinho da Costa Lopes, Francisco Xavier do Amaral, antigu Prezidente Repúblika no Primeiru-Ministru,Taur Matan Ruak, Tenent- Jenerál, Lere Anan Timur, Komandante David Alex ‘Daitula’, atuál Vise-Xefe Estadu Maiór Jenerál FALINTIL – Forsa Defeza Timor-Leste (F-FDTL) Brigadeiru Jenerál Domingos Raul ‘Falur Rate Laek’, atuál Primeiru-Ministru Kay Rala Xanana Gusmão, atuál Prezidente Repúblika José Ramos Horta no antigu Prezidente Repúblika, Nicolau Lobato.
Jornalista : Osória Marques
Editora : Julia Chatarina
