DILI, 04 setembru 2024 (TATOLI) – Prezidente Repúblika, José Ramos Horta, louva Governu ne’ebé lideradu husi Primeiru-Ministru,Kay Rala Xanana Gusmão, halo preparasaun ne’ebé di’ak tebes hodi simu vizita Papa Francisco ne’ebé sei akontese iha loron 09-11 semana oin.
“Infraestrutura ne’ebé agora Governu halo ne’e la’ós atu simu Amu Papa de’it, maibé permanente ona iha Timor, ita haree Tasi-tolu agora bonitu, kapas loos, parabéns ba Governu no ADN,” Horta hateten ba jornalista sira iha Dili, kuarta ne’e.
Notísia relevante:Vizita Papa Francisco lori grasa mai Timor-Leste
Prezidente Repúblika dehan, Tasi-tolu nakfilak ona ba situ turistíku iha nasaun ne’e no husu Governu atu kontinua proteje nafatin ba oin bainhira Papa nia-vizita ramata.
“Tasi-tolu sai ona hanesan situ turistíku iha nasaun ne’e, kapela Tasi-tolu se ita ho matenek komersiál kapela ne’e bele sai bisnis boot ida ba igreja tanba ema hotu hakarak halo kazamentu iha ne’ebá,” nia dehan.
Tuir Xefe Estadu, ida ne’e hanesan kontribuisaun boot ida ba istória Timor-Leste.
“Amu-Papa mai iha ne’e, kontribui mós ba komérsiu turistíku ne’ebé boot tebes. Ha’u apela ba povu hotu katak, ita hamutuk hatudu ba Amu-Papa hakruk ba nia nu’udar Xefe igreja katólika iha mundu, nia kontribui atu tau ita iha mapa mundu nian, hanesan mós uluk Papa João Paulo II mai iha ne’e tau ona Timor nia naran iha mundu,” nia tenik.
Rekorda fali katak, iha loron 5 fulan-jullu tinan 2024, Vatikanu anunsia ofisialmente, programa Vizita Papa Francisco nian mai Timor-Leste, ne’ebé halo parte husi ninia Viajen Apostólika ba Ázia, ne’ebé marka ona ba períodu husi loron 2 to’o loron 13 fulan-setembru tinan 2024.
Aleinde Timor-Leste, viajen ida-ne’e mós inklui etapas iha Indonézia, Papua-Nova Giné no Singapura.
Santu Padre sei to’o iha Timor-Leste iha segunda-feira, loron 9 fulan-setembru tinan 2024, sei hela iha Timor to’o kuarta-feira, loron 11 fulan-setembru tinan 2024.
Programa detalladu ba vizita Papa Francisco mai Timor-Leste hahú ho resesaun ofisiál uainhira Papa to’o iha Aeroporto Internacional Presidente Nicolau Lobato iha tuku 14:10.
Iha tuku 18:00, sei hala’o serimónia boazvindas iha área esteriór Palásiu Prezidensiál, tuir kedas ho vizita kortezia ba Prezidente Repúblika iha tuku 18:30. Santu Padre sei hala’o sorumutu ida ho autoridade lokál, sosiedade sivíl no korpu diplomátiku iha sala Palásiu Prezidensiál iha tuku 19:00, iha ne’ebé sei halo diskursu ida.
Iha tersa-feira, loron 10 fulan-setembru, tuku 08:45, Papa sei vizita labarik sira ho defisiénsia husi Eskola “Irmãs Alma”. Tuku 09:30, sei hala’o sorumutu ho bispu no membru sira seluk igreja katólika nasionál nian iha Katedrál Imaculada Conceição. Tuku 10:45, Papa sei hala’o sorumutu ho membrus Kompañia de Jesus iha Nunsiatura Apostólika.
Pontu aas husi vizita ne’e maka iha loron 10 fulan-setembru mós, selebrasaun Santa Misa iha resintu Tasi Tolu, ne’ebé sei hahú iha tuku 16:30 no iha tempu ne’e Papa Francisco sei halo omilia.
Iha kuarta-feira, loron 11 fulan-setembru, Papa Francisco sei hasoru joven sira iha Sentru Konvensoins Dili, iha tuku 09:30, iha ne’ebé sei halo diskursu ida. Iha tuku 10:45, sei hala’o serimónia despedida iha Aeroporto Internacional Presidente Nicolau Lobato, tuir mai Papa sei arranka ba Singapura iha tuku 11:15.
Notísia relevante:Membru F-FDTL-PNTL 4.000 sei fó seguransa ba vizita Papa Francisco
Jornalista: Hortencio Sanchez
Editór: Florencio Miranda Ximenes
