DILI, 05 Setembru 2024 (TATOLI) – Sarani sira husi Rejiaun Administrativa Espesiál Oé-Cusse Ambeno (RAEOA) ne’ebé daudaun ne’e hela iha fatin konsentrasaun iha Pelican Paradise sente seguru, tanba alimentasaun, bee-moos no saneamentu báziku preparadu.
“Kona-ba alimentasaun nian ne’e, ba ami nu’udar sarani ita la preokupa buat ida, tanba ita hein de’it to’o tempu komisaun sira lori mai, ne’ebé konforme ita-nia vontade atu han. Tanba komisaun prepara ne’e kompletu kedas, atu hahán fali ka bee-moos”, Prezidente Konsellu Pastorál Sentru Parókia Numbei, João Evaristo Bobo, informa ba Tatoli, iha Pélican Paradise, Tíbar, ohin.
João Bobo satisfeitu ho preparaun komisaun organizadora iha fatuin konsetrasaun, tanba bombeiro rega rai-rahun, ekipa saúde instala nia fatin hodi fó atendimentu ba sarani sira no instala mós postu seguransa Polísia Nasionál Timor-Leste (PNTL).
“Durante loron rua iha ne’e, laiha problema. Ema balu dehan iha ne’e rai-rahun, maibé ekipa bombeiru rega loroloron, fatin ba saúde, seguransa sira mós kompletu iha ne’e. Ba hariis-fatin iha ne’e hamutuk 90, ne’ebé sufisiente ba sarani 2.344, ho tan bee estavel tanba karreta tanke husi SAS Oé-Cusse mós preparadu iha ne’e, kuandu falta uitoan sira enxe kedas”, nia relata.
Iha Fatin hanesan Maria Tapu husi parókia Oésilo agradese tanba nu’udar sarani katólika importante mak simu bensaun husi Papa Francisco ne’ebé sei prezide misa iha Tasi-Tolu.
“Horisehik to’o iha ne’e, fatin ne’ebé ami la espera, maibé ami tuur no toba iha ne’e sente di’ak, liuliu ba bee-moos, hariis-fatin no hahán. Ami sente kontente ho komisaun nia preparasaun, maibé ida-ne’e la importante ba ami nu’udar sarani katólika. Importante mak mai atu simu bensaun husi amu Papa, ne’ebé sei akontese iha misa iha Tasi-Tolu, semana oin”, katak.
Baptista da Cunha husi parókia Baoknana dehan nu’udar sarani kumpre orientasaun husi parókia hodi prepara aan atu partisipa misa iha Tasi-Tolu.
“Ami nafatin tuir orientasaun husi parókia no komisaun sira, maibé ami sente kontente, tanba fatin ne’e seguru no iha ne’e fahe ba grupu mane no feto hela ketak-ketak”, dehan.
Dadus peregrinu sira husi Oé-Cusse ne’ebé daudaun to’o iha Dili no konsentra iha Pelican Pradise hamutuk 800-resin no hetan seguransa husi PNTL.
Notísia relevante: Peregrinu 400 husi Oé-Cusse viajen uluk ona bá Dili hodi partisipa misa
Jornalista: Abílio Elo Nini
Editora: Maria Auxiliadora
