DILI, 06 Setembru 2024 (TATOLI) – Arsebispu Arkidioseze Metropolitana Dili, Dom Virgílio Kardeál do Carmo da Silva fó benvindu ba peregrinu sira husi Rejiaun Administrativa Espesiál Oé-Cusse Ambeno (RAEOA), tanba loron tolu ona hela iha akantonamentu iha Pelican Paradise hodi hein partisipa misa solene iha Tasi-Tolu, ne’ebé sei prezide husi Papa Francisco iha 10 Setembru tuku 16h00.
“Sarani Oé-Cusse mai loron tolu iha fatin akantonamentu, ho admirasaun agradese no parabéns ba autoridade husi Dili no RAEOA, tanba prepara kondisaun la’ós di’ak liu, maibé pelu menus iha fatin dignu atu hela iha tenda, atu sarani sira iha mahon hodi hein Santu Padre”, Dom Virgílio hateten hafoin vizita peregrinu sira iha Pelican Paradise, Tíbar, ohin.
Notísia relevante: Razaun Papa Francisco prezide misa Tasi-Tolu ho lian portugés
Arsebispu hatutan katak ho situasaun sira hanesan ne’e fó hanoin fali uluk bei-ala sira bainhira atu bá iha selebrasaun boot ida, sempre bá uluk hodi hein, dalaruma to’o semana.
“Tanba ne’e, atu hanoin filafali istória fiar nian ba iha igreja Katólika. Ha’u mai vizita, fó benvindu no ha’u enkoraja nafatin sira maske loron-manas, tanba ita hotu mai ho espirítu halo peregrinasaun. Peregrinasaun ne’e katak sempre mai ho kosar, manas, hamlaha no kolen, maibé ezersísiu espirítuál ne’ebé ita hotu halo atu manán grasa Maromak nian, ne’ebé ita hotu buka hodi hasoru vigáriu Kristu nian. Ida ne’e mak sai razaun no motivasaun ba ita hotu, liuliu peregrinu sira mai ho dejezu atu hasoru vigáriu Kristu ne’ebé vizita ita-nia rai”, Dom Virgílio dehan.
Arsebispu salienta katak ho preparasaun sira-ne’e hotu atu loke ema nia fuan no laran atu grasa ne’ebé ema hotu hein bele fó bensaun ba rai no ba sarani tomak iha Timor-Leste.
Notísia relevante: Peregrinu 400 husi Oé-Cusse viajen uluk ona bá Dili hodi partisipa misa
Iha fatin hanesan, Prezidente Autoridade RAEOA, Rogério Tiago Lobato, hateten sarani Oé-Cusse barak mak mai atu partisipa misa, tan ne’e autoridade iha obrigasaun kria kondisaun hodi monta tan tenda balun, tanba última viajen peregrinu sira husi Oé-Cusse mai iha Dili iha loron 07 Setembru.
“Kona-ba hahán nian, ne’e ha’u garante to’o oras ne’e seidauk iha problema. Naturalmente, ema sira mai iha ne’e, mai ho sira-nia sakrifisíu no espíritu, maibé mezmu mai ho espíritu sakrifísiu maibé sira tenke han uitoan ka barak ami sempre buka atu fó tuir buat ne’ebé ami bele”, nia garante.
Kona-ba seguransa daudaun ne’e instala postu Polísia Nasionál Timor-Leste (PNTL) no saúde iha fatin konsentrasaun atu fó atendimentu dignu ba peregrinu sira durante estadia iha akampamentu iha Pelican Paradise.
“Família kuandu mai vizita bele halo iha loron, maibé kalan ami taka tuku 10, nune’e ema sira-ne’e bele deskansa atu prepara-aan hodi simu Papa Francisco”, nia hateten.
Notísia relevante: Papa Francisco prezide misa aberta ba sarani 80,000 iha Estádiu Gelora Bung Karno
Tuir dadus, peregrinu sira husi Oé-Cusse daudaun to’o ona iha Díli no hela iha fatin konsentrasaun Pelican Pradise hamutuk 1000-resin no hetan seguransa másima husi PNTL no autoridade RAEOA.
Jornalista: Abílio Elo Nini
Editora: Maria Auxiliadora
