DILI, 06 setembru 2024 (TATOLI)—Diretór Ezekutivu Fórum Organizasaun Naun Governamentál Timor-Leste (FONGTIL), Valentim da Costa Pinto ‘Koko’, iha esperansa bele iha balansu fotografia líder nasionál iha salaun Papa Francisco, ne’ebé foin lansa semana ne’e, iha Palásiu Prezidensiál, Bairru-Pité.
“Ami sente triste oituan ba publikasaun fotografia ba ita-nia autór ka pesoál sira-ne’ebé envolve direita iha ita-nia luta naruk ida-ne’e, ami iha esperansa katak fotografia sira-ne’e tenke ho balansu, ne’ebé mai husi líder hotu-hotu ne’ebé konsidera sai hanesan autór xave ba ita-nia luta ba auto-determinasaun,” Diretór Ezekutivu FONGTIL, informa ba Agência Tatoli, iha Caicoli, sesta ne’e.
Nia dehan, Estadu tenke konsidera líder sira-ne’ebé mak kontribui ona ba luta independénsia.
“Bainhira iha líder balun ne’ebé nia fotografia la mosu, ha’u hanoin triste, espera katak sira sei bele kompleta ida-ne’e tanba konsiderasaun ita hatuur istóriku didi’ak atubele sai hanesan bukae ida ba ita-nia jerasaun sira tuir mai ne’e bele komunga istória ne’ebé loos hodi bele kontribui ba ita-nia dezenvolvimentu nasionál ne’ebé sei mai,” nia tenik.
Notísia relevante : PR Horta inaugura salaun Nobre Papa Francisco
Maski Tenente-Jenerál Reformadu, Lere Anan Timur, deklara ona katak razaun líder nasionál balun nia fotografia laiha salaun ne’e tanba espasu no líder balun reprezenta ona entre líder nasionál seluk, maibé Diretór FONGTIL konsidera la’ós dezafiu, tanba ne’e tenke buka meiu hodi bele inklui hotu.
“La’ós dezafiu espasu, ita iha kapasidade tékniku iha matenek barak ne’ebé bele halo, ema iha mundu, ema-nia fotografia ne’e tama hotu di’ak, nusa mak ida-ne’e labele, ne’ebé ita presiza iha konsiderasaun atu hatuur istória loloos ba sidadaun sira, ida-ne’e tenke sai prinsipál ne’ebé la’ós espasu ka saida, tanba iha matenek barak ne’ebé bele jere oinsá mak ema hotu presiza tama ne’e bele tama,” nia tenik.
Valentim rekomenda ba Governu no Estadu atu haree prosesu luta ida-ne’e hodi sira ne’ebé iha pasadu serbisu hamutuk, sira bele tau hotu iha laran nune’e bele promove unidade no sei hatuur istória di’ak no loloos ba jerasaun tuir mai.
“Ba futuru ha’u hanoin ita-nia ukun-na’in sira, autór sira kuaze sei moris, entaun bele halo korresaun ruma, nune’e bainhira sira-nia sub-ordináriu prepara dokumentu ruma sira bele lee no rekomenda atu líder hotu ba prosesu luta ida ne’e hodi sira ne’ebé iha pasadu serbisu hamutuk, sira bele tau hotu iha laran hodi bele promove unidade no sei hatuur istória di’ak no loloos ba ita-nia jerasaun sira-ne’ebé tuir mai, ka se bele ita bele rekorda sai hanesan patrimóniu Estadu ida-ne’ebé ita sei bele proteje ba tinan naruk mai,” nia katak.
Jornalista : Osória Marques
Editora : Julia Chatarina
