DILI, 06 setembru 2024 (TATOLI) – Governu liuhosi Ministériu Petróleu no Rekursu Minerál (MPRM), Ministériu Administrasaun Estatál (MAE), no Ajénsia Dezenvolvimentu Nasionál (ADN), finaliza ona fatin konsentrasaun bá peregrinu sira hosi Munisípiu Covalima.
Fatin konsentrasaun ne’e lokaliza iha iha aldeia Liu Boulelo, suku Tibar, munisípiu Liquiça. Fatin sira ne’e kompleta kedas ho fasilidade hanesan tenda, haris-fatin, bee-moos, fatin Tau lixo, inklui dapur jerál ida hodi tau hahán sira ne’ebé sei fornese hosi kompañia bá peregrinu sira.
Totál peregrinu hosi Covalima hamutuk 5.000, ne’ebé sei desloka hosi Covalima iha domingu (08/09), dader tuku 07:00 otl. “Fatin ba sarani sira hosi Covalima preparadu ona tanba dadaun ami prepara ona fasilidade sira hanesan tenda, haris-fatin no fasilidade seluk-tán. Lista ne’ebé antes ami simu hamutuk 4.000 maibé tanba sarani kontinua rejista entaun sa’e ona ba rihun lima” Koordenadór Komisaun Organizadora peregrinu Covalima, Joanico Mendonça haktuir bá Agência Tatoli, iha Tibar, sexta ne’e.
Atuál Diretór Nasionál IT-MPRM ne’e hatutan, ekipa komisaun organizadora fahe ba grupu rua mak hanesan grupu ida hamutuk ho Prezidente Autoridade Covalima hodi organiza deslokasaun peregrinu hosi munisípiu enkuantu grupu seluk prepara fatin iha ne’ebé deside ona.
Tenda ne’ebé komisaun harii ona hamutuk 27 maibé anin-bo’ot entaun sobu tenda balun. Ho ida-ne’e Komisaun koordena ona ho Autoridade lokál no lia-na’in hodi halo tuir kultura, nune’e bele proteje fasilidade sira ne’ebé instala.
Iha fatin hanesan, tenda na’in, João Abotak haktuir katak, sira hetan fiar hosi Governu hodi monta tenda ho kuantidade 27, maibé la’ós sira de’it iha mós ekipa seluk ne’ebé governu fó fiar hodi monta tenda sira ne’e.
“Tenda ami monta hotu ona tanba anin maka’as ne’ebé ami halo esforsu hotu hodi kesi metin para anin labele sobu monu kona ita-nia maluk sira”, nia dehan.
Tenda sira ne’e governu aluga hahú hosi loron 6 to’o 11 setembru, kada kalan selu $50.
Notísia relasionada: Sarani 15.000 hosi Ermera sei partisipa misa iha Tasi-Tolu
Jornalistaː Domingos Piedade Freitas
Editoraː Isaura Lemos de Deus
