DILI, 06 setembru 2024 (TATOLI) – Koordenadór ba Sesaun Liturjia ba Preparasaun Misa iha Tasi-Tolu Dili, Padre Justinu Tanec, informa sesaun liturjia prepara ona ajenda prinsipál haat ne’ebé kuaze konklui hodi garante misa solene iha Tasi-Tolu.
Preparativu sira ne’ebé halo, dahuluk, kona-ba espasu ka fatin liturjia hanesan altar, ambaun, kadeira, meza ne’ebé persiza durante misa iha ne’ebé kuaze 100% ona, tanba ba buat sira-ne’ebé nesesáriu iha selebrasaun misa solene ne’ebé sei prezide direita husi Papa Fransisco.
“Falta buat balun de’it, ami tenke halibur husi parókia no instituisaun sira hanesan IGEADE. Agora, iha prosesu identifikasaun no aban to’o bairua sei mobiliza ona meja sakristia atu lori ona bá Tasi-Tolu”, amu Justinu Tanec esplika iha entrevista eskluziva ho Tatoli iha estúdiu Farol, Dili.
Daruak, kona-ba veste litúrjika hanesan kazula, estola ba amu Papa prontu ona no ba hatais liturjia nian ne’e mós antes ne’e Konferénsia Episkopál Timorense sosa ona mirta (xapeo Papa nian) iha Vatikanu atu uza.
“Entaun koselebrante sira hotu, hahú husi Kardeál to’o padre koselebrante sira, ita prepara kazula 700 no estola ho kór-mutin no daudaun ne’e rai hela iha igreja Katedral Dili. Balun estrika hela, loron 07 no 08 Setembru mak transfere husi igreja Katedral bá sakristia ne’ebé preparadu ona iha Tasi-Tolu hamutuk haat”, katak.
Datoluk, kona-ba vaju liturjia, hanesan sibóriu no galleta balun sosa ona husi Vatikanu, liuliu kálise ba Santu Padre no ba amu Kardeál no fatin tau livru iha selebrasaun ne’e mós sosa ona no buat hotu prontu.
“Buat sira-ne’e hotu tanba apoia másimu husi embaixada Timor-Leste iha Vatikanu no ami foti ona iha fulan-Jullu. Agora, ita-nia preparasaun kuaze atu to’o ona nia rohan. Entaun, kona-ba vaju liturjia ita prepara mós sibóriu rihun 4 ba ministru estraordináriu ne’ebé sei fahe komuñaun iha misa, ne’ebé ita sosa husi Indonézia no kompletu ona iha Timor-Leste no horisehik ami transfere ona husi Lecidere bá iha Tasi-Tolu”, esplika.
Saserdote ne’e dehan sasán sira-ne’e tau iha Eskola 12 de Outubro, hanesan fatin ba tau sasán sira hanesan sibóriu, óstia no sesaun liturjia atu konsentra hodi prepara óstia ba iha sibóriu.
Notísia relevante: Razaun Papa Francisco prezide misa Tasi-Tolu ho lian portugés
Preparasaun seluk mak kona-ba testu liturjia nia ne’ebé parte liturjia asina ona nota termu entrega husi komisaun iha Sekretáriadu Motael, ne’ebé simu ona testu ba misa nian hamutuk 2.200 ne’ebé prodús husi Governu. “Testu boot 200 sei fahe ba koselebrante VIP sira no 2.000 sei fahe ba altu nivél sira no sarani ne’ebé persiza. Aleinde ne’e mós ho testu múzika nian. Realiza ona termu entrega husi Governu hamutuk 1.100 ba korru sira”.
“Ajenda haat ne’e, hahú kedas husi fatin liturjia, selebrasaun liturjia, hatais, sibóriu no kálise no testu sira-ne’e, sai nu’udar prioridade iha serbisu liturjia nian, ne’ebé ha’u bele dehan prontu hotu ona”, amu garante.
Notísia relevante: Papa Francisco agradese povu Indonézia no kontinua viajen ba PNG
Saserdote ne’e dehan Governu, liuhusi IGEADE oferese meza 600 ba iha Tasi-Tolu, nomós kadeira ne’ebé prepara ba konselebrante prinsipál sira, VIP, kardeál no bispu sira iha misa solene nian.
Jornalista: Abílio Elo Nini
Editora: Maria Auxiliadora
