LIQUIÇÁ, 07 setembru 2024 (TATOLI)-Governu prepara ona kondisaun hanesan bee-moos, saneamentu bázika hanesan Sintina no hariis-fatin inklui elestrisidade iha fatin área Kaitehu, aldeia Mota-Ikun, suku Mota-Ulun, postu administrativu Bazartete, munisípiu Liquiçá hodi prepara simu sarani husi munisípiu Bobonaro atu partisipa misa iha Tasi-Tolu, Dili ne’ebé prezide husi sua Santidade Papa Francisco.
Enjeñeiru Ajénsia Dezenvolvimentu Nasionál (ADN) Munisípiu Bobonaro, Moises Angélico, observa servisu fíziku hotu kompañia Haksolok implmeneta kuaze besik konklui tanba falta de’it ona monta tenda.
Notisia relevante: Sarani Bobonaro rihun 20 sei partisipa misa iha Tasi-Tolu
“Ninia prosesu 100% ona agora ita aumenta tan mak tenda unidade 22 ne’e husi kompañia no apoia husi Ministru Transporte no Komunikasaun,” nia informa ba Jornalista Tatoli, iha Kaitehu, sábadu ne’e.
Tuir nia, fatin ne’e sufisiente atu akumula peregrinu husi munisípiu Bobonaro ho totál 1000-resin tanba lokaliza iha área luan.
Enkuantu hariis-fatin no sintina mós bele korrsoponde ba númeru peregrinu tanba kompañia Haksolok prepara uma unidade sia ne’ebé fahe ba feto ho mane nia.
“Ita divida ba haris-fatin 45 no sintina 45 hamutuk 90, ida-ne’e mak fasilidade ne’ebe preparadu ba perigrinu sira atu mai hela iha-ne’e,” nia katak.
Biban ne’e Ministru Transporte no Komunikasaun, Miguel Manetelo, esklarese apoia ne’ebé ministeriu fó mak hanesan, tenda unidade sia, lona, bee-ákua kaisa 1000 inklui biskuit.
Nia dehan, apoia ne’e MTK oferese bazea ba despaxu husi Primeiru Ministru, Kay Rala Xanana Gusmao, tanba haree katak preparasaun iha fatin ne’e ladún la’o ho di’ak.
“Horikalan ami ho ADN munisípiu nia kontaktu kedas kompañia balu atu fornese tan lona ho tenda mai iha fatin ida-ne’e, entaun ita kontribui tenda ukuran 6X5 sia ne’e husi ha’u hanesan Miguel, ákua ho biskuit no lona ne’e husi ministériu nian,” nia hateten.
Enkuantu tuir observasaun Jornalista TATOLI, iha terrenu nota katak ekipa servisu saúde munisipál Bobonaro ho Cruz Vermelha Timor-Leste (CVTL) filiál Maliana iha loron-sesta (06/09) ne’e instala ona tenda hodi halo atendimentu primeiru sókoru ba sarani ne’ebé moras.
Tuir informasaun ne’ebé TATOLI asesu Prezidente Autoridade Munisípiu Bobonaro Alexandrini Pires, mós husu ona empreza lokál balu iha Balibó atu apoia tan tenda hodi prepara fatin deskansa ne’ebé seguru ba sarani sira.
Notísia relevante: Loron ikus rejistu: Sarani Munisípiu Dili kontinua forma to’o kalan
Jornalista: Sergio da Cruz
Editór: Evaristo Soares Martins
