DILI, 07 Setembru 2024 (TATOLI) – Ospitál temporariu ne’ebé Ministériu Saúde instala iha Tasi-Tolu prontu ona atu atende sarani sira bainhira, iha ámbitu misa solene ne’ebé prezide husi Papa Francisco, iha loron 10 Setembru 2024, mak hetan problema saúde ruma, informa Koorndenadór Ospitál temporáriu, Vidal de Jesus Lopes.
“Ospitál temporáriu ne’ebé hein utiliza hodi halo atendimentu ba pasiente sira ne’ebé hetan moras iha ámbitu misa, tanba iha ne’e kama ita monta hotu ona 200 -resin, soru-been, oksijéniu, ai-moruk no ekipamentu médiku seluk ne’ebé iha”, responsavel ne’e informa iha Tasi-Tolu.
Koordenadór ne’e salienta katak bainhira sarani balun monu, husi postu saúde 20 ne’ebé instala iha arreadór Tasi-Tolu mak sei atende uluk no kuandu labele mak lori bá iha ospitál temporáriu mak médiku sira halo atendimentu. Bainhira iha fatin ne’e mak ladi’ak bele halo transferénsia bá Ospitál Nasionál Guido Valadares (HNGV), Bidau.
“Postu saúde iha arreadór misa nian ne’e sei tau kama iha ne’ebá, depois halo observasaun ba pasiente. Se labele ona lori mai ospitál temporáriu hodi haree no halo atendimentu, bainhira iha ne’e la diak nafatin ita halo transferénsia bá HNGV, maibé iha postu saúde mak sira halo observasaun di’ak ona, pasiente ne’e bele tuir fali misa”, nia reitera.
Iha sorin seluk, Koordenadór Seksaun Saúde iha Ministériu Saúde, Gustódio Alves de Jesus, informa profisionál saúde hamutuk 800-resin mak preparadu ba vizita Papa Francisco mai Timor Leste hodi halo atendimentu duarante loron 09 to’o 11 Setembru.
“Ami halo ona koordenasaun no mobilizasaun ba saida mak ekipa saúde nasionál halo ona iha semana rua ba kotuk. Iha koordenasaun ho komisaun organizadora mak ita monta ona postu saúde 20 iha iha arreadór misa nian”, Gustódio de Jesus esplika.
Tuir observasaun jornalista Tatoli, fatin kuarentena ne’ebé uluk utiliza ba pasiente infetadu ho covid-19 ne’e mak agora transforma ba ospitál temporáriu ne’ebé kuartu ida tau kama ualu no kompleta kedan ho ekipamentu médiku nian.
Notísia relevante: Profisionál saúde liu 800 prepara durante vizita Papa Francisco
Jornalista: Felicidade Ximenes
Editora: Maria Auxiliadora
