DILI, 07 Setembru 2024 (TATOLI) – Peregrinu hamutuk 1.045 husi Ataúro iha ona fatin konsentrasaun Pelican Paradise, Tíbar, atu partisipa misa solene ne’ebé sei dirije husi Papa Francisco iha loron 10 Setembru 2024.
Prezidente Komisaun Organziadora husi Parókia Nossa Senhora de Fátima Ataúro, padre Guido Perreira, informa katak orariu viajen sarani sira fahe ba etapa rua, hahú iha loron 06 to’o 7 Setembru, tanba laloran tasi boot.
“Lista ne’ebé ami rekolla ona iha peregrinu 1.045. Primeiru etapa mai iha horisehik hamutuk 348. Ohin, etapa ikus nian hamutuk 502, maibé ho mós sarani Ataúro oan sira iha Dili sei mai hela hotu iha ne’e depois mak sei konfere lista finál nian”, saserdote ne’e dehan ba Tatoli iha Tíbar, ohin.
Amu ne’e agradese ba peregrinu sira husi Ataúro tanba viajen iha situasaun diferente, tanba liuhusi tasi ho laloran boot, maibé konsege to’o duni fatin konsentrasaun.
“Ami mós agradese tanba Governu liuhusi Ministériu Turizmu no MAE prepara fatin ne’ebé di’ak no tau-matan hodi instala fatin ne’e kompleta ho bee-moos”, nia hato’o.
Saserdote ne’e dehan kona-ba fornesimentu ba hahán, iha inísiu Ministériu Turizmu mak apoia, maibé agora autoridade Ataúro mak sei fornese fali hahán durante sarani sira estadia iha akantonamentu.
“Kona-ba hariis-fatin sufisiénte tanba iha 60, ne’ebé ha’u hanoin sei jere ho di’ak atu hotu-hotu bele hetan no uza ho responsabilidade. Ami-nia viajen ne’e pakote ida, tanba serbisu hamutuk, entaun ami mai ne’e kompletu, saúde, seguransa no prezidente ho autoridade mai konsentra hotu iha ne’e”, nia hateten.
Iha fatin hanesan, Julieta Freitas ne’ebé tuir peregrinasaun ne’e sente satisfeitu atu partisipa iha misa ne’ebé prezide direta husi Papa Francisco iha Tasi-Tolu.
“Ami kontente tanba [Papa] la’ós mai kada tinan, tan ne’e ami lakohi lakon oportunidade atu partisipa misa ne’ebé lidera rasik husi Sua Santidade Papa Francisco. Ami espera ho [ni] prezensa iha Timor-Leste bele fó domin no dame mai ita, liuliu joven sira ne’ebé mak oras ne’e daudaun balu nsei moris hela iha konflitu nia laran”, nia realsa.
Sentimentu hanesan mós husi José Araújo, tanba Papa Francisco ho laran ksolok tebes hodi hit-aan mai to’o Timor-Leste, tanba ne’e nia hakarak simu grasa husi Amu Papa.
Notísia relevante: Governu prepara ona fatin ba peregrinu 6.024 husi Viqueque iha Hera
Tuir observasaun jornalista, iha fatin konsentrasaun ne’e hetan seguransa másima husi Polísia Nasionál Timor-Leste.
Jornalista: Abílio Elo Nini
Editora: Maria Auxiliadora
