SEATOU: “Jornalista bele halo kobertura maibé uza kartaun identidade no uniforme”
DILI, 07 setembru 2024 (TATOLI)–Sekretaria Estadu Asuntu Toponímia no Organizasaun Urbana (SEATOU), Germano Santa Brites, hateten nia parte mak hapara atividade kobertura no haruka jornalista hamoos video, tanba iha momentu ne’eba ne’e situasaun dezkontroladu no jornalista tenke uza kartaun identidade no uniforme bainhira hala’o kobertura iha espasu públiku.
Notísia Relevante: PR Horta kondena maka’as SEATOU halo atuasaun agresivu hasoru negosiánte ambulante
“Ita-boot sira ka jornalista bele mai halo kobertura maibé uza kartaun identidade no uniforme. Ne’e ita-boot sira livre kobre atividade iha espasu públiku. Ami la bandu jornalista atu halo kobertura. Ha’u mak haruka dehan delate video tanba situasaun dezkontroladu,”
Sekretáriu Estadu Asuntu Toponímia no Organizasaun Urbana (SEATOU), Germano Santa Brites, hateten liuhusi konferénsia imprensa iha Colmera, sábadu ne’e.
Aleinde ne’e, Diretór Nasionál ijiene no Orden Públika iha Sekretária Estadu Asuntu Toponímia no Organizasaun Urbana (SEATOU), Egas José Caet, hateten atausaun ekipa konjunta Sekretária Estadu Asuntu Toponímia no Organizasaun Urbana (SEATOU) hasoru vendedór sira iha Kampung Baru, Comoro, iha 03 setembru 2024 ne’e, akontese tanba atuasaun inisiu atu muda vendedór sira ba merkadu Maleuana ne’e, vendedór sira tuda fali membru ekipa konjunta.
“SEATOU lidera ekipa boot refere ho intensaun atu organiza sasán husi vendedór sira-ne’ebé fó sai dalabarak ona hodi hasai objetu hanesan gerobak no sasán hodi tula ba karreta ne’ebé prepara ona hodi kontinua prosesu tuir Dekretu-Lei nú. 03/2024, tanba la tuir regra ordenamentu,” Diretór hateten liuhusi konferénsia imprensa.
Nia hateten, bainhira ekipa sira hasa’e sasán ba karreta laran, hetan ona provokasaun insulta no iha tempu hanesan mós hetan tuda hodi provoka situasaun la di’ak ne’ebé sai iha vídeo ne’ebé viral, tanba ekipa hetan tuda no na’in-hitu hetan tuda no ida hetan baku husi vendedór sira.
SEATOU toma responsabilidade ba akontesimentu iha loron 03 setembru 2024 no sei la tolera negosiante sira hala’o atividade negósiu iha espasu públiku no SEATOU konsiente nu’udar adeverténsia ikus liu faan iha fatin públiku.
SEATOU mantein muda negosiante sira iha espasu públiku ba merkadu hodi asegura kapitál Dili sai organizadu.
Tanba, nia dehan, vendedór sira faan iha espasu públiku hanesan iha Kampung Baru, antigu merkadu Comoro no iha jardim Largo de Lecidere ne’e, impede movimentu transporte públiku ka engarafamentu, asidente, barrullu no problema sira seluk.
“Espasu iha merkadu Manleuana ne’e iha hela, ne’ebé vendedór hotu-hotu lori nia tenda hodi tama ba laran, atu hein prosesu konstrusaun merkadu tuir mai,” nia hateten.
Governante ne’e esplika, Governu prepara daudaun kondisaun hanesan hatetuk rai mamuk merkadu Manleuana no reabilita toilet públiku, prepara bee-moos no saneamentu ba vendeór sira iha merkadu Maleuana.
Sekretariu Estadu refere ekipa SEATOU halo nia servisu tuir artigu 11 Dekretu-Lei nú. 03/2024 kona-ba ijiene no orden públika.
Jornalista : Jesuína Xavier
Editór : Cancio Ximenes
