DILI, 07 setembru 2024 (TATOLI)–Prezidente Fundasaun Meskita Annur, Abdullah Said Sagran, hateten vizita amu Papa nian mai Timor-Leste ne’e atu hametin konvivénsia no fraterniadade umana no toleránsia, hamutuk hodi harii nasaun Timor-Leste ba oin mak futuru ida sai prosperu fízikamente no espiritualmente.
Notísia Relevante: Prezidente CET prefere matéria fraternidade umana sai parte ida husi morál-relijiaun
“Nu’udar ema sei iha nesesidade ba iha prosperiedade fízika mak bein-estar iha mundu ne’e. Espirituál mak ema ida-idak prepara no hadi’a nia aan ba ema-nia bein komun, oinsa bele moris iha mundu seluk tuir relijiaun nia fiar. “Asaun di’ak iha mundu ne’e, hodi ba moris iha mundu seluk,” Prezidente Fundasaun Meskita Annur, Abdullah Said Sagran, hateten ba Agência Tatoli, iha Kampung Alor, sábadu ne’e.
Tuir nia, Timor-Leste laiha diskriminasaun entre relijiaun hahú iha nia ezisténsia to’o agora ne’e laiha konflitu interrese entre relijiaun ida ba relijiaun seluk.
“Iha Governu Portugés nia tempu mós ami moris ho komunidade Katólika no Protestante hanesan maun-alin. Prezensa amu Papa nian atu hametin valór fiar nian,” nia dehan.
Tuir nia, Vatikanu mós iha nia programa ba mundu hotu-hotu no Timor-Leste servisu hamutuk ho Vatikanu kle’ur ona, no agora prezensa amu Papa nian ne’e bele hametin tan servisu Estadu rai rua ne’e.
“Lideransa timorense fiar-na’in no hametin sira-nia fiar sei hadi’a dezenvolvimentu nasionál tuir Maromak nia hakarak, entaun sidadaun timoroan sei hetan esperansa foun,” nia hateten. espera.
Nia hateten, Papa Francisco hala’o vizita Estadu no pastorál iha Timor-Leste iha loron 09 to’o 11 setembru 2024 ne’e, nu’udar vizita istóriku no hametin fiar sarani katólika iha Timor-Leste no valór espirituál relijiaun ida-idak nian.
“Ida-ne’e vizita ida istóriku husi prezensa sua Santidade Papa Francisco mai iha Timor-Leste. Ida-ne’e ami iha esperansa boot katak iha país maioria katólika, ne’eduni ho fiar metin ita ida-idak nian hodi hametin ita-nia valór espirituál bazeia ba iha relijiaun ida-idak nian,” nia hateten.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Jornalista : Jesuína Xavier
Editór : Cancio Ximenes
