DILI, 08 Setembru 2024 (TATOLI) – Peregrinu hamutuk rihun 10-resin husi munisípiu Ainaro mak rejista ona atu partisipa misa iha Tasi-Tolu, informa Prezidente Autoridade Ainaro, Manuela Corte-Real.
“Ita iha ona sarani hamutuk 10.400-resin mak sei tun mai Dili atu partisipa misa iha Tasi-Tolu. Peregrinu sira ne’e aban maka foin mai husi Ainaro”, prezidente ne’e hateten ba Tatoli iha fatin konsentrasaun, iha Hudi-Laran, ohin.
Nia relata katak sarani sira ne’ebé tama uluk ona maka ekipa kulturál hamutuk ema na’in-150, ministru estraordináriu 160, reprezentante joven sira ne’ebé sei partisipa iha enkontru ho Papa Francisco iha Sentru Konvesaun Dili no katekista sira ne’ebé sei hasoru Santu Padre iha igreja katedrál.
“Aban dadeer ita-nia sarani 150 sei prepara atu simu Papa Francisco tuir arku ne’ebé ita instala ona iha dalan Comoro ne’e. Sira sei hatais hotu tais Ainaro nian. Ita sei prepara sira sedu atu tuku 09:30 tenke iha ona fatin hodi forma atu simu Papa”, nia adianta.
Prezidente ne’e dehan relasiona ho fatin ne’ebé sarani sira atu hela ne’e nia kondisaun di’ak tebes no ekipamentu sira ne’ebé instala ona iha akantonamentu mak hanesan tenda ka baraka ba sira atu toba, hariis-fatin no sintina, bee-moos. Aleinde ne’e ba ai-han no bee hemu mós preparadu.
Atu garante kondisaun ida di’ak ba peregrinu sira ne’e, Manuela Corte Real nu’udar responvel ba komisaun organizadora lokál ne’e hamutuk ho ekipa téknika sira halo preparasaun atu sarani bele hela iha fatin ne’ebé seguru.
Nia husu ba peregrinu sira husi Ainaro atu durante loron tolu iha Dili prepara aan ho didi’ak hodi partisipa misa iha Tasi-Tolu ho kondisaun saudavel.
Misa solene ne’e sei prezide husi Papa Francisco ne’ebé sei realiza iha loron 10 Setembru.
Notísia relevante: Sarani sira husi Ainaro hamutuk 9.000 sei partisipa misa solene iha Tasi-Tolu
Jornalista: Tomé Amado
Editora: Maria Auxiliadora
