Autoridade munisípiu Lautém hili tais Sikalau hodi tara ba Papa Francisco
DILI, 08 setembru 2024 (TATOLI)–Autoridade munisípiu Lautém hili ona tais Sikalau hodi tara iha Papa Francisco, iha segunda (09/09).
“Ami husi munisípiu Lautém hamriik iha área Fatuhada nian, hodi simu Sua Santidade Papa mai. Ami sei uza tais Sikalau husi postu administrativu Tutuala nian mak tara ba Sua Santidade Papa,” Prezidente Autoridade Munisípiu (PAM) Lautém, Mélio de Jesus, hateten, iha Fatuhada, domingu ne’e.
Sarani hamutuk 150 husi munisípiu Lautém, kompostu husi kada postu reprezenta ema na’in-25, sei hamriik iha estrada hodi bidu no tebe simu Amu Papa.
“Ami Lautém sei uza ami-nia kultura rasik no sidadaun hotu sei uza tais Lautém hodi simu Papa. Lautém iha postu administrativu neen no ami-nia tais mós la hanesan, entaun kada postu mai ho nia identidade rasik ho nia tebedai rasik,” nia esplika.
Notísia relevante : Papa sira ne’ebé lidera ona Igreja Katólika iha istória: Husi São Pedro to’o Papa Francisco
Autoridade Lautém envolve mós labarik kiik-oan inklui ema ho defisiénsia hodi hamriik iha dalan.
Aleinde ne’e, rejista ona sarani hamutuk 5.503 husi munisípiu Lautém sei partisipa misa solene iha Tasi-tolu, iha tersa (10/09).
“Maibé la taka dalan ba Lautém-oan sira ne’ebé la rejistu, hakarak mós tuir misa. Nune’e mós, reprezentante joven husi munisípiu Lautém ne’ebé sei enkontru ho Sua Santidade Papa Francisco iha Sentru Konvensaun Dili (CCD, sigla portugés) hamutuk 14, ne’ebé husi kada postu reprezenta ema na’in-rua,” PAM Lautém, tenik.
Jornalista : Osória Marques
Editora : Julia Chatarina
