DILI, 08 setembru 2024 (TATOLI)–Ekipa husi munisípiu Ermera monta kafé ba arku iha dalan ninin, iha ámbitu fó bem-vindu ba Papa Francisco, ne’ebé sei estadia iha Dili iha loron 09 to’o 11 setembru.
“Arku munisípiu Ermera nian ne’e rasik iha simbolizasaun, ami sei tau kafé reprezenta munisípiu Ermera ne’ebé iha nia kultura rasik no iha nia espesifikasaun rasik, la hanesan ho munisípiu seluk,” Prezidente Autoridade Munisípiu (PAM) Ermera, José Martinho Soares, hateten, iha Fatuhada, domingu ne’e.
Notísia relevante : PM Xanana no membru Governu sira halo limpeza iha dalan protokolu
Ekipa husi Ermera antes ne’e tun mai Dili hodi prepara halo arku durante loron-rua, ne’ebé kesi arku ne’e metru 300.
“Peregrinu Ermera preparadu simu Papa iha aban ho identidade kafé. Ami kontente no orgullu,” nia akresenta.
Ekipa responsável sira rejista peregrinu 15.000-resin husi Ermera sei partisipa iha misa solene iha Tasi-tolu ne’ebé sei prezide direta husi Papa Francisco, iha tersa (10/09). Peregrinu sira ne’e sei hela iha Tibar Pertamina Devita nia sorin mai.
Aleinde ne’e, rejista mós joven 124 husi Ermera sei partisipa iha diálogu ho Amu Papa, iha Sentru Konsensaun Dili (CCD, sigla portugés), iha kuarta (11/09).
Jornalista : Osória Marques
Editora : Julia Chatarina
