DILI, 08 setembru 2024 (TATOLI)–Primeiru-Ministru (PM), Kay Rala Xanana Gusmão hamutuk ho membru IX Governu sira, domingu ne’e, halo limpeza iha dalan protokolu, hahú husi área Tower Fatuhada to’o Aitarak-laran, hodi simu vizita Apostólika husi Papa Francisco, iha loron 09 to’o 11 setembru.
Sekretária Estadu ba Igualdade, Elvina Sousa Carvalho, hateten, atividade ne’e presiza ema hotu nia serbisu hamutuk hodi bele iha susesu, tanba ne’e ohin Xefe Governu no liña ministeriál sira halo limpeza nune’e dalan sira bele moos no furak.
“Ita presiza prepara infraestrutura no presiza mós halo limpeza, ida-ne’e importante tebes tanba kuandu buat hotu loos ona no feitu ona, entaun parte limpeza ne’e tenke, atu nune’e bele furak no ita simu Papa Francisco,” Sekretária Estadu hato’o ba Agência Tatoli, iha ámbitu limpeza jerál iha Fatuhada.
Notísia relevante : Prepara simu Amu Papa, Viqueque-oan finaliza monta arku iha estrada protokolu Dili
Nune’e, governante ne’e dezeja parte hotu nia kolaborasaun tantu Estadu, Governu, sosiedade sivil, inklui sarani ein jerál.
“Ha’u apresia tebes ho sarani sira-nia entuziasmu hodi prepara-an simu Papa, buat ne’ebé ha’u haree mak husi kada munisípiu halo uma-adat, enfeita dalan públiku ho arku oin-oin, no sira mós tau kada identidade tais, koroa, belak, no seluk tan,” nia akresenta.
Sekretária Estadu nota, sidadaun sira kontente prepara simu Papa, nune’e espera katak husi vizita Apostólika ba dala-45 ne’e bele lori espíritu foun, naroman, bensaun, no grasa mai timoroan sira.
“Ha’u-nia esperansa mak Papa nia vizita bele hametin ita-nia fiar hanesan ema sarani katólika,” nia tenik.
Membru Governu sira ne’ebé halo limpeza jerál mak hanesan Vise-Ministra Negósiu Estranjeiru no Kooperasaun, Milena Rangel, Ministra Solidariedade Sosiál no Inkluzaun, Verónica das Dores, Ministra Edukasaun, Dulce de Jesus Soares no seluk tan.
Tuir observasaun jornalista iha terrenu, nota katak maski loron manas no anin maibé membru Governu ho sira-nia ekipa kontinua dasa-rai, suru no hili foer sira.
Nota mós katak, ekipa responsável sira enfeita dalan hahú rotunda Comoro to’o Mandarin ho tali-tahan, nuu-tahan, ai-funan, no tais husi munisípiu hotu ne’ebé reprezenta identidade Timor.
Jornalista : Osória Marques
Editora : Julia Chatarina
