DILI, 08 Setembru 2024 (TATOLI) – Peregrinu hamutuk 4.365 hosi Covalima too ona fatin konsentrasaun, ihaTibar atu partisipa misa solene ne’ebé sei dirije hosi Papa Francisco, iha tersa-feira, iha Tasi Tolu, Dili.
Prezidente Autoridade Munisipál Covalima, Miguel Armada Cardoso, informa transporte hamutuk 195 mak tula peregrinu sira no balun uza sira nia transporte rasik.
Tuir Miguel Armada Cardoso, autoridade lokál servisu hamutuk ho Komandu Polísia Nasionál Timor-Leste hosi Munisípiu Covalima hodi garante seguransa ba peregrinu sira nia viajem.
“Preparasaun ba peregrinu sira hosi Covalima iha Tibar di’ak no kapaz tebtebes. Governu, liu husi Ministériu Petróleu no Rekursus Minerais (MPRM) mak prepara kondisaun sira ne’e. Akampamentu sira ne’e sufisiente hodi deskansa”, Prezidente Autoridade Munisipál Covalima hateten bá Tatoli, iha Tibar, Munisípiu Liquiçá.
Dirijente afirma katak katak Covalima hili ona ema na’in-150 hodi simu Papa Francisco ho kultura, iha área Aimutin.
Relasiona ho hahán, MPRM oferese ba ohin, maibé aban no bainrua sei prepara hosi Autoridade Munisípiu Covalima.
Simao Vasco Mau, peregrinu Hosi Covalima, sente kontente no apresia ministériu nia preparasaun. “Ha’u sente kontente tebes bele partisipa misa ne’ebé mak dirije hosi Santu Padre, iha Tasi Tolu. Misa ne’ebé dirije hosi Papa laos tinan lima dala ida, maibe tempu di’ak ida mak bele mai hamutuk ho ita”, reafirma.
Notísia relevante: Governu prepara ona fatin bá peregrinu hosi Covalima
Jornalistaː Domingos Piedade Freitas
Editoraː Isaura Lemos de Deus
