Vizita Santo Padre nian hametin fraternidade entre relijiaun iha Timor-Leste
DILI, 08 setembru (TATOLI)–Pastor husi igreja protestante Hosana iha Timor-Leste, Lourenço dos Santos, konsidera vizita pastorál no Estadu sua Santidade Papa Francisco iha loron 09 to’o 11 setembru 2024 ne’e, sei hametin fraternidade entre relijiaun iha Timor-Leste.
Notísia Relevante: Vizita Papa Francisco hametin fraternidade umana no toleránsia
“Fo bem-vindu no onra ba ita-nia sua Santidade Papa Francisco mai rai doben Timor-Leste, tanba fó oportunidade, esperansa no fraternidade relijiaun metin liutan iha rai ida-ne’e,” Pastor Lorenço dos Santos hateten ba Agência TATOLI liuhusi telefónika, domingu ne’e.
Vizita Estadu Santo Padre nian ne’e mós sei fó biban ida ba lideransa timoroan sira hodi bele hametin pás no unidade.
“Ida-ne’e mós líder sira fó liman ba malu serbisu hamutuk hodi dezenvolve rai ida-ne’e bele buras ho Dame no unidade iha Nasaun ida-ne’e,” nia dehan.
Nia garante, vizita amu Papa nian bele ajuda lideransa sira hodi aselera progresu dezenvolvimentu iha Timor-Leste tanba ida-ne’e oportunidade di’ak ba ema hotu.
Timor-Leste iha preparasaun di’ak ba iha vizita Santu Padre nian hanesan preparasaun infraestrutura no materiál, maibé importante liu mak preparasaun espirituál atu hametin fiar no moral ema ida-nian nu’udar sarani ka sidadaun kristu nian.
“Preparasaun espirituál atu hametin kreda nia fiar. Preparasaun fuan atu iha mudansa ba iha sosiedade di’ak,” nia dehan.
Nia husu ba ema hotu atu muda mentalidade, morál no hahalok hodi moris hakmatek iha moris espirituál, tanba ida-ne’e mak importante liu ba iha vizita amu Papa nian mai Timor-Leste ne’e.
Jornalista : Jesuína Xavier
Editór : Câncio Ximenes
