Ali Adbul: Prezensa Papa la’ós ba relijiaun ida, maibé ba povu Timór
DILI, 09 Setembru 2024 (TATOLI) – Ali Adbul Pinus, nu’udar komunidade musulmana Timor-Leste sente kontente hafoin simu bensaun husi Papa Francisco iha dalan protokolu Kampung Alor.
“Nu’udar timoroan orgullu no sente kontente. Uluk 1989 ha’u mós partisipa iha Tasi-Tolu, maibé ami bá ho vizaun ketak atu halo demostrasaun ba ukun rasik-aan. Ohin, ha’u mai atu haree direta Papa Francisco, tanba nia mai la’ós ba relijiaun ida, maibé mai ba povu Timor-Leste atu fó bensaun ba ita hotu”, nia hateten ba Tatoli, iha Kampung Alor, ohin.
Ali Adbul Pinus aprezenta nia razaun prezensa hodi simu Papa Francisco hamutuk ho família, tanba ne’e mai husi nia konxiénsia rasik atu hetan bensaun naroman nian.
“Ha’u mai laiha orientasaun ruma, mai hanesan timoroan. Ha’u-nia kaben ho ha’u-nia oan sira relijiaun katólika, ne’ebé ha’u tenke mai, nune’e ha’u-nia família hetan naroman no kontente atu hetan bensaun husi Papa Francisco, tanba mai lori dame ba povu Timór”, nia hato’o.
Notísia relevante: Aban, Komunidade Musulmanu TL hamriik iha dalan simu Papa Francisco
Jornalista: Abílio Elo Nini
Editora: Maria Auxiliadora
