DILI, 09 setembru 2024 (TATOLI)–Estudante husi Ensinu Báziku Filiál Fatuhada, Manuel Amaral, entuziasmu no kontente bele hamutuk ho nia kolega sira, desde dadeer, hodi hein prezensa Papa Francisco iha Dili.
“Ha’u kontente loos, tanba ne’e mak ha’u mai hein iha estrada. Ha’u foin primeira vez atu haree Papa nia oin direitamente. Tanba ne’e, orsida karik ami bele kaer Papa nia liman, ha’u sei husu bensaun atu sai labarik ne’ebé matenek. Durante ne’e ita akopaña husi rede sosiál de’it, maibé orsida ne’e sei haree diretamente, nune’e hanesan grasa ida mai timoroan espesiál ba estudante,” Manuel Amaral, espresa nia sentimentu kontente, iha Fatuhada, segunda ne’e.
Notísia relevante : Sarani Baucau simu Papa Francisco ho dansa kultura iha Ponte CPLP
Nune’e mós, estudante Cristiano Sampaio, sente kontente hodi hein Amu Papa Francisco nia prezensa.
“Kontente loos hodi hein Papa ninia prezensa iha ne’e. Ha’u hakarak husu Papa atu fó bensaun mai ha’u atu sai labarik ne’ebé matenek nomós husu atu fó bensaun ba Timor-Leste,” nia tenik.
Iha sorin seluk, Sekretáriu Estadu Ensinu Sekundária Jerál no Tékniku vokasional, Domingos Lopes Lemos, hateten, Ministériu Edukasaun (ME) orienta Edukasaun munisípiu Dili hodi organiza estudante sira forma iha estrada simu Papa Francisco.
“Ita fó orientasaun ba Dirasaun Edukasaun munisípiu Dili hodi organiza estudante hamriik kaer bandarolas iha estrada ibun, hahú husi eskola 30 Agostu mai kontinua Eskola Sekundáriu Jerál (ESJ) 10 Dezembru fatuhada, inklui eskola Annur no Farol. Eskola sira ba parte Becora nia la hola parte tanba transporte la halo movimentu bá-mai, entaun eskola sira husi parte Vera Crúz no Dom Aleixo ne’e obrigatóriamente tanba sira besik liu dalan protokolu,” Sekretáriu Estadu informa.
Eskola sira ne’ebé sei hamriik iha dalan protukolu mak Eskola Ensinu Báziku 30 de Agostu, ESJ 10 Dezembru, ESJ Finantil, EBF Fatuhada, EBC Faról, no ESJ Annur.
Jornalista : Osória Marques
Editora : Julia Chatarina
