DILI, 09 setembru 2024 (TATOLI) – Líder Nasionál hanesan mós Eis-Titular Francisco Guterres Lú Olo, Marí Alkatiri no Taur Matan Ruak inklui sira seluk tama ona iha Palásiu Prezidensiál iha tuku 17:15, hodi enkontru ho Sua Santidade Papa Francisco.
Tuir observasaun Jornalista Tatoli nota katak , Líder nasionál na’in-tolu ne’e tama iha Palásiu Prezidensiál atu partisipa sorumutu ho Papa Francisco ne’ebé sei hala’o iha tuku 18:00 loraik no sei hala’o mós enkontru no líder nasaun nian hotu, lider relijiaun sira hotu no sosiedade sivíl iha nasaun ne’e.
Notísia relevante: Palásiu Prezidensiál preparadu simu vizita Sua Santidade Papa Francisco
Aleinde líder na’in tolu ne’e iha mós lider seluk hanesan Xefe Estadu Maiór das Forsas Armadas, Tenente Jenerál Falur Rate Laek to’o iha Palásiu Prezidensiál iha tuku 17:10 no Prezidente Parlamentu Nasionál to’o tuku 17:15.
Nune’e lider relijiaun sira iha Timor-Leste mós balun hahú tama ona iha Palásiu Prezidensiál hodi hein enkontru ho Sua Santidade Papa Francisco.
Notísia relevante: PR Horta nu’udar kampiaun mundiál ba promove valór fraternidade umana
Jornalista: Hortencio Sanchez
Editór: Florencio Miranda Ximenes
