DILI, 09 setembru 2024 (TATOLI) – Noemia Ximenes Sarmento, inan isin-rua, akompaña hosi nia kaben Antoninho da Costa no oan feto na’in-rua, hosi Tuana-Laran, ho entuziasmu hein iha Kampu Futsál, Bebora, Dili, hodi hein vista Papa Francisco mai Timor-Leste.
“Vizita Papa Francisco mai iha Timor-Leste ne’e momentu úniku tebes, ne’e duni ha’u hamrik iha ne’e hodi lori ho há’u nia bebé atu simu bensaun. Maske loron manás, ita tenki halo sakrífisiu hodi simu bénsaun, liliu ba ha’u nia bebé”, informa Noemia Ximenes Sarmento ba Tatoli, iha Kampu Futsál Bebora, Dili.
Nune’e mós Noemia nia kaben, Antoninho da Costa hateten vizita apostólika Papa Francisco mai Timor-Leste hanesan nasaun eskollidu husi Santu Padre, ne’ebé hanesan mós iha tempu uluk “Maromak hili povu Israel, maske ki’ik, maibe nia mak bo’ot ba nasaun hotu-hotu iha mundu”.
“Ha’u deside lori família ki’ik ne’e hamutuk ho hau nia kaben ho objetivu hodi simu bensaun, tanba nia [Papa] mak sai reprezentante ba Kristu, no Saun Pedro nia saseluk iha mundu ida ne’e, tanba iha termu ida ema dehan Kristu Vizível, Kristu nia saseluk ne’ebé ita haree ho matan, rona ho tilun no ka’er ho liman mak Santu Padre”, nia hatete.
Iha fatin hanesan, Vítor Perreira, hela iha Quintal Boot, hatete nia hamrik iha fatin ne’e komesa tuku 10 dader otl, tanba hakarak atu haree Papa. “ha’u kontente tebes atu simu vizita Papa, tanba uluk iha tinan 1989 Papa João Paulo II mai vizita Timor, ha’u foin tinan 15, maibé la konsege mai, tanba momentu ami iha de’it foho [Atabae]”, haktuir.
Vítor Perreira akresenta bainhira rona infromasaun katak Amu Papa atu mai vizita Timor-Leste, nia konsidera ida ne’e hanesan “gloria bo’ot ida ba povu no sarani sira”.
Notísia Relevante: Estudante entuziasmu hein prezensa Papa Francisco
Jornalista: Afonso do Rosário
Editora: Isaura Lemos de Deus
