DILI, 09 setembru 2024 (TATOLI)–Joven husi aldeia 04 Marconi, suku Fatuhada, postu administrativu Dom Aleixo, munisípiu Dili, segunda lorokraik ne’e, ho inisiativa halo limpeza dalan iha área tasi-ibun Marconi, hodi hein prezensa Papa Francisco ba iha Kongregasaun Asosiasi Lembaga Misionaris Awam (ALMA).
Tuir ajenda, Amu Papa sei sai husi nia rezidénsia Nunsiatura Apostólika, iha Faról, iha tersa (10/09), tuku 08:35.
“Ida-ne’e la’ós orientasaun ruma husi parte Governu mak ami halo limpeza, maibe ida-ne’e ami-nia inisiativa hodi limpeza, iha área tasi ibun Marconi nian, tanba Papa aban bá iha ALMA sei liuhusi iha dalan ida-ne’e,” Xefe aldeia 04 Marconi, Edy Macmur, hateten, iha ámbitu limpeza.
Notísia relevante : Kongregasaun ALMA prepara labarik na’in-tolu tara-tais no oferese ai-funan ba Papa Francisco
Limpeza ida-ne’e hanesan kultura ida iha aldeia 04, ne’ebé kada sesta sempre halo limpeza hodi kontribui ba ambiente moos no furak iha kapitál Dili.
“Dili ne’e kapitál nasaun Timor-Leste nian, nune’e presiza ho ambiente ne’ebé moos no saudável, entaun kada sesta ne’e ami sempre halo limpeza,” nia akresenta.
Xefe aldeia sente kontente no orgullu ho prezensa Papa Francisco.
“Ita-nia nasaun ne’e kiik no hanesan foin-sa’e hela, ne’ebé ho prezensa Sua Santidade Papa Francisco nian ne’e sei lori matenek no umilde,” nia katak.
Tuir observasaun Jornalista iha terrenu, nota katak iha joven maizumenus 50-resin mak halo limpeza jerál.
Jornalista : Osória Marques
Editora : Julia Chatarina
