BOBONARO, 05 setembru 2024 (TATOLI) — Kongregasaun Asosiasi Lembaga Misionari Awam (ALMA) prepara labarik na’in-tolu atu tara-tais no oferese ai-funan iha vizita Papa Francisco iha kongregasaun referida.
Tuir ajenda, sua Santidade Papa Francisco iha loron 10 setembru 2024 oras 08:00 dadeer sei hala’o vizita ba Kongregasaun Asosiasi Lembaga Misonari Awam (ALMA), ne’ebé sei simu hosi labarik ho Kondisaun Ema ho Defisiénsia (EhD) na’in-tolu no tara-tais no oferese mós ai-funan.
Labarik na’in-tolu ne’e komposta hosi feto na’in-rua hanesan; Ulla ho Micela tinan ualu (8) no mane ida ho naran Aldo idade tinan hitu (7).
Notísia relevante: Madre ALMA prepara labarik EhD na’in-60 simu Papa Francisco
“Ha’u kontente, espera amu Papa haraik isin di’ak ba labarik sira,” Aldo dada lia ho Jornalista Ajénsia TATOLI, Agapito dos Santos, iha konventu ALMA, Praia dos Coqueiros, Dili, kinta ne’e.
“Ha’u kontente, ha’u hakarak Amu Papa bensaun no fó sesesu mai ha’u,” Micela espresa sentimentu ho espresaun kontente hodi hein prezensa Papa Francisco iha kongregasaun referida.
ALMA prepara labarik na’in-tolu
Enkuantu Kongregasaun ALMA prepara labarik na’in-tolu hosi totál hamutuk na’in-61 no madre na’in-40 mak sei halo enkontru ho Santidade Papa Francisco.
Asuntu ne’e hato’o hosi Manorin-Na’in hosi ALMA, Madre Marta Eduarda dos Santos, liuhosi programa Entrevista Eskluziva Ajénsia Tatoli,IP ne’ebé realiza iha estúdiu travesa Sérgio Viera de Melo, Dili, kinta ne’e.
Madre Marta esplika, labarik hirak-ne’e mai ho kapasidade no kondisaun oinoin hanesan; syndrome, autisme, intelektuál mentál no fízika.
“Iha vizita labarik sira mak prepara ona atu simu Sua Santidade Papa, iha labarik na’in 61 hamutuk madre 41, labarik sira-ne’e ho nesesidade espesiál, defisiénsia sira, ne’ebé mak durante ne’e ami tau-matan, hela ho ami no sira-ne’ebé mak hela besik ami-nia viziñu no sira-ne’ebé iha munisípiu hamutuk ho ami iha ami-nia fatin na’in-18,” Madre ne’e esplika.
Madre ne’e esplika, sekuénsia vizita Papa ba Kongresaun ALMA mak hanesan; labarik na’in-rua sei simu ho tara-tais no fó ai-funan, akompaña madre sira hananu saserdote, babadok, tebe-likurai, hafoin ne’e madre sira lori Papa ba aula laran hodi konversa ho labarik sira.
“Labarik sei ko’alia ho Papa Francisco tuir kapasidade Intelektuál no jestu idak-idak, sira balu ne’ebé sei bele ko’alia, sira koalia, balu ne’ebé labele ko’alia bele rona,” Madre ne’e akresenta.
Iha vizita apostólika ne’e Santu Padre mós sei asina plaka ne’ebé kongragasaun ne’e prepara no ikus liu taka ho kanta Agradese ba Maromak’.
Madre Marta realsa, kongregasaun ALMA sente kontente bainhira hetan konvite atu simu líder Katóliku Mundiál ne’e iha fatin kongresaun simples ne’ebé la kleur tán sei komemora nia ezistensia ba da-60.
“Ami simu ho lima rua, agradese, maske ami ki’ik, serbí ba ema mukit ho simples tebes, maibé Maromak la taka matan, amu Papa hili ami, ida-ne’e ami sente hanesan penyeleggara Ilahi,” Madre ne’e subliña.
Atu simu vizita Amu Papa, Governu halo ona reabilitasaun ba fatin kongresaun ALMA, jardín no seluk tán.
Alende ne’e kongregasaun mós sempre reza hasa’e orasaun espirituál nia ba sarani hotu-hotu no Papa Francisco atubele halo viajen mai Timor-Leste ho kondisaun di’ak no saudável nafatin to’o fila ba Roma.
Madre ne’e fiar katak, prezensa vizita Papa Francisco ne’e bele motiva liután Madre Kongregasaaun ALMA atu serbí ho fuan no laran ba ema hotu, tuir viziaun no misaun konregasaun referida.
“Ami husu nafatin Papa, keta haluha ami iha orasaun, atu nune’e ami kongregasaun ALMA ne’ebé mak hakarak tau-matan ba labarik sira, espesialmente defisiénsia sira no ema hotu ne’ebé ami serbí iha mundu, atu moris loron-loron bele sai di’ak liután.” Madre ne’e katak.
Madre Marta husu ba Papa Francisco, atu kontinua hametin fraternidade umana inklui toleránsia ba ema hotu katak labele halo diskriminasaun ba ema, liuliu inan-aman no oan sira-ne’ebé ho kondisaun defisiénsia.
Tui nia, vizita Papa Francisco mai Timor-Leste bele motiva no hakle’an liután sarani sira-nia fiar, iha aspeitu kultura, sosiedade, nasaun no uma kreda.
“Ita tenke atensaun didiak atu nune’e grasa boot no bensaun ne’ebé amu Papa fó bele sai bukae ida ba ita-nia moris loron loron,” Madre ne’e knklui.
Notísia relevante: Papa Francisco vizita ALMA iha Pantai Kelapa koinside ho aniversáriu ALMA da-60
Jornalista: Sérgio da Cruz
Editór: Evaristo Soares Martins
