DILI, 14 agostu 2024 (TATOLI)–Madre sira husi kongregasaun Asosiasi Lembaga Misionari Awam (ALMA) iha Pantai Kelapa, Dili, prepara labarik sira hanesan ema ho defisiénsia (EhD) hamutuk 60, atu simu vizita sua santidade Papa Francisco iha 10 setembru 2024.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Madre Superiora ALMA nian, Jetrudis Bidi, hateten labarik sira-ne’e iha ema na’in-28 hela hamutuk ho madre sira no labarik ema ho defisiénsia sira seluk ne’e, hanesan labarik sira-ne’ebé halo terapia no hala’o sira-nia formasaun husi segunda to’o sesta.
“Labarik sira-ne’ebé hela ho sira-nia inan-aman no balun hela iha kogregasaun ALMA ne’e hamutuk 60 mak sei simu vizita Papa nian,” Madre Superiora ALMA, Jetrudis Bidi, hateten ba Agência TATOLI, iha Pantai Kelapa.
Madre ne’e esplika, sira-ne’ebé hela iha li’ur ka hela ho inan-aman sei lori ba rezidénsia madre ALMA nian no toba iha ne’eba iha 09 setembru, atu bele halo preparasaun hodi marka prezensa simu sua santidade Papa Francisco.
“Ba sedu iha ne’ebá atu labarik sira iha vontade no sente haksolok simu vizita Santu Padre,” nia hateten.
Iha vizita amu Papa nian ne’e, madre sira prepara atividade animasaun hamutuk ho labarik sira ho ema defisiénsia hanesan hananu múzika lian Tetun ho Italia, dansa kultura babadok no poezia.
“Ida-ne’e mak ami-nia preparasaun ba vizita papa nian mai iha ne’e. Iha mós preparasaun sira seluk mak kuidadu saúde no preparasaun fuan labarik sira-nian,” nia dehan.
Ilha fatin hanesan, madre Marta dos Santos, hateten preparasaun labarik sira-nian ne’e tuir kapasidade sira-nian hanesan ema ho defisiénsia.
“Ami koñese ami-nia oan sira hela iha ne’e no loron-loron mai halo terapia iha ne’e. Se nia kanta di’ak no tebe di’ak halo tuir ida-ne’e, ne’ebé formasaun la’o di’ak,” nia hateten.
Relijioza ne’e hateten, agradese tanba amu Papa bele vizita labarik sira ema ho defisiénsia hanesan grasa no bensaun ida, no labarik sira-ne’ebé simu Papa ne’e bele reprezenta sira-nia maluk sira-ne’ebé la marka prezensa.
“Depoizde vizita ida-ne’e, ami bele buka tempu ba vizita fali sira-ne’ebe kontatu ona maibé la mai tanba hela dook. Vizita sai di’ak ba ita katak ema hotu hanesan iha Maromak Nia oin,” nia dehan.
Notísia Relevante: Governu entrega reabilitasaun Katedrál-rezidénsia madre ALMA ba Igreja
Jornalista : Jesuína Xavier
Editór : Cancio Ximenes
