Governu entrega reabilitasaun Katedrál-rezidénsia madre ALMA ba Igreja

DILI, 08 agostu 2024 (TATOLI)—Governu Konstitusionál da-sia (IX), segunda ne’e, entrega obra reabilitasaun igreja Katedral Dili no rezidénsia madre Asosiasi Lembaga Misonaris Awam (ALMA) ba Arsebispu Arkidioseze Metropolitana Dili, Dom Virgílio Kardeál do Carmo, SDB.

Jerente Empreza Bhakti Karya Timor (BTK), Nasrol Naslin, entrega obra reabilitasaun katedrál ba Diretór Ezekutivu Ajénsia Dezenvolvimentu Nasionál (ADN), Lorenço Marçal da Costa, ba Ministru Administrasaun Estatal (MAE), Tomás do Rosário Cabral no ba Arsebispu Arkedioseze Metropolitana Díli, Dom Vírgilio Kardeal do Carmo da Silva.

“Ita konsege halo ona reabilitasaun total ba katedrál ba vizita Santu Padre ne’ebé sei mai. Atu fó hatene ba ita-boot sira katak valor kontratu ba reabilitasaun ne’e ho total orsamentu $533.032.23. Ida-ne’e mak ita halo hodi empreza realiza obra,” Diretór-Ezekutivu ADN, Lorenço Marçal da Costa, hateten iha nia diskursu, iha Katedrál, Vila Verde, Dili.

Diretór ne’e hato’o agradesimentu tomak ba kolaborasaun tomak liuhusi ba igreja no amu Pároku no sarani sira ba tempu oferses ba empreza halo ramata obra reabilitasaun ne’e ho di’ak.

Iha fatin hanesan, Jerente Empreza Bhakti Karya Timor BTK, Nasrol Sudiwanto, hato’o agradesimentu ba Governu liuhusi Ajénsia Dezenvolvimentu Nasionál, Ministériu Administrasaun Estatál no igreja ne’ebe fó konfiansa ba empreza Arqueiros Unipesoál, Lda, iha BTK hodi konklui obra reabilitasaun ne’e.

“Ida-ne’e liuhusi apoiu no kolaborasaun di’ak, tanba ne’e mak empreza termina obra reabilitasaun ne’e,” nia hateten.

Jerente ne’e garante empreza kontinua termina buat balun kona-ba obra ne’e, se presiza to’o vizita Amu Papa nian.

Arsebispu Arkidioseze Metropolitana Díli, Dom Vírgilio Kardeál do Carmo da Silva, SDB, hateten igreja hahú simu reabilitasaun katedrál ne’ebé termina husi empreza BTK ba preparativu simu vizita Papa nian.

“Ita halibur hamutuk iha ne’e ofisialmente simu obra reabilitasaun katedrál ne’ebé entrega husi kompañia ba ADN ba Governu no ba uma kreda. Fatin ida-ne’e mak uma amu Papa sei hasoru malu ho bispu, padre no madre, seminarista no katekista sira. Tan ne’e, ho Governu nia jenerozidade hakaas aan iha fulan neen nia laran, ita haree katedrál sai oin seluk tiha,” Kardeál hateten iha nia diskursu.

Ne’eduni, bispu Dili ne’e hato’o agradesimentu ba Primeiru-Ministru, MAE no ADN, tanba furak ida-ne’e ema hotu mai iha ne’e hodi haree.

Timor iha 96% katólika entaun katedrál mak sai hanesan uma lisan, entaun sarani katólika tenke prepara aan simu Santu Padre.

Arsebispu esplika, entrega ona tanba igreja hakarak halo atividade rituál misa no susesór no vigariu hakarak mai haree nia ema sira iha Katedrál.

“Ohin ba oin, katedral sei loke fila-fali ba sarani sira. Tan ne’e, husu ba ema hotu atu kolabora ba iha susesu vizita amu Papa nian,” nia husu.

Governu entrega reabilitasaun rezidénsia madre ALMA ba igreja

Iha fatin seluk, Governu liuhusi Ajénsia Dezenvolvimentu Nasionál (ADN) entrega reabilitasaun rezidénsia Madre ALMA ba Ministru Administrasaun Estatál, Tomás do Rosário Cabral no kontinua entrega ba Arsebispu Arkidioseze Metropolitana Díli, Dom Vírgilio Kardeal do Carmo da Silva.

Diretor Ezekutivu ADN, Mariano Marçal, hateten rezidénsia Madre ALMA sai mós fatin xave ba iha vizita amu Papa Francisco nian, tanba ne’e mak Governu tau osan hamutuk $285.746.068 hodi halo reabilitasaun.

“Kompañia HOVEN II mak kaer obra reabilitasaun ida-ne’e iha fulan haat nia laran,” nia hateten.

Ministru Administrasaun Estatál, Tomás do Rosário Cabral, husu ba madre ALMA sira atu kuidadu fatin ne’ebé Governu tau ona osan hodi halo reabilitasaun.

“Obra ne’e ohin entrega ba madre sira kontinua kuidadu ba. Osan povu nian, tanba ne’e responsabiliza ba atu bele utiliza ba tempu naruk to’o tinan 20 hanesan ne’e mak bele hadi’a fali,” nia dehan.

Arsebispu Arkidioseze Metropolitana Díli, Dom Vírgilio Kardeál do Carmo da Silva, hateten rezidénsia Madre ALMA hanesan fatin daruak ne’ebé amu sei vizita.

“Amu Papa sei liu iha ne’e hodi hasoru malu ho ita-nia oan no alin sira ho defisiénsia oioin ne’ebé ita-nia madre sira tau matan ne’e,” Kardeal hateten.

Arsebispu konsidera, Governu tau osan reabilita fatin ne’ebá, tanba Santu Padre sei vizita no fatin ne’ebá mós Sentru aprendizajen ba ema ho defisiénsia oioin husi li’ur ne’ebé aprende ho madre sira.

“Agradese ba Governu ne’ebé hadi’a ona fatin ba vizita sua Santidade nian. Fatin sai furak ba labarik sira ho defisiénsia oioin ne’ebé hela iha ne’e no sira-ne’ebé mai halo sira nia formasaun. Madre sira kuidadu ba atu bele uza ba fatin formasaun ba tempu naruk,” nia dehan.

Jornalista : Jesuína Xavier

Editór        : Cancio Ximenes