DILI, 09 setembru 2024 (TATOLI)—Labarik sira husi Grupu Sentru Fatuhada entusiazmu simu Papa Francisco iha dalan ninin, ne’ebé tuir planu sei to’o iha Aeroportu Internasionál Prezidente Nicolau Lobato, segunda (09/09), iha tuku 14:10.
Labarik husi Grupu Sentru Fatuhada, Maria da Graça Lopes Sequeira, sente kontente no orgullu tebes bele hetan oportunidade haree direita Papa Francisco.
“Dadeer-oan ne’e ha’u hamriik ho kolega sira iha ne’e hodi simu Papa, ha’u kontente no hakarak atu hakoak Papa. Karik Papa Francisco besik kaer ha’u-nia liman, ha’u husu Amu fó bensaun ba ha’u, nune’e sai labarik ne’ebé matenek no hadomi na’in,” Maria da Graça hato’o ba Agência Tatoli, iha Fatuhada.
Notísia relevante : Ekipa dansa kultura Viqueque preparadu simu Amu Papa Francisco iha estrada Bebora
Labarik sira ne’e sei hamutuk hodi oferese múzika bem-vindu ba Papa Francisco.
“Ha’u dehan bem-vindu Amu Papa Francisco, haraik grasa no bensaun ba ami kiik-oan sira iha ne’e,” nia akresenta.
Iha sorin seluk, Responsável ekipa, Eva Soares, sente orgullu no alegria hodi simu Papa Francisco iha loron ohin, maski loron manas, maibé nafatin iha espíritu no vontade hodi hein.
“Ha’u nu’udar responsável ba labarik iha Sentru Fatuhada ne’e orgullu no kontente tebes atu simu Amu Papa, nune’e durante loron hirak-ne’e ami prepara no ohin hakarak oferese ami-nia múzika bem-vindu ba Sua Santidade,” Maria da Graça, katak.
Nia espera, vizita Apostólika ne’e bele lori k’solok no domin mai labarik sira. “Tanba labarik sira mak futuru ba nasaun.”
Jornalista : Osória Marques
Editora : Julia Chatarina
