VIQUEQUE, 09 setembru 2024 (TATOLI)- Ekipa dansa kultura husi munisípiu Viqueque no akompaña husi Komisaun orgnizadora vizita Papa Sua Santidade nivél Munisípiu Viqueque, segunda ne’e, sai husi fatin kosentrasaun iha aldeia Mota Ki’ik, suku Hera, postu administrativu Cristo Rei, munisípiu Viqueque.
Daudaun ne’e, ekipa dansa kultura prepara ona iha fatin ne’ebé prepara iha área Bebora, Dili hodi hein no simu Sua Santidade Papa Francisco ne’ebé sei to’o iha aeroportu internasionál Nicolao Lobato, tuku 02h10.
Reprezenta ekipa avansadu, Honorio S. Cruz, relata, ekipa dansa kultura ne’e prepara ona iha fatin arku munisípiu Viqueque nian ne’ebé iha dalan protokolu Bebora.
“Ita-nia ekipa dansa kultura parte Viqueque, ohin sai dadersan, atu prepara iha fatin Bebora hodi hein simu Papa Francisco. Daudaun ne’e ita-nia sekretáriu munisípiu Viqueque akompaña sira no ekipa komisaun avansadu sira”, Honorio S. Cruz, hateten ba Agência Tatoli, Hera, ohin.
Ekipa dansa kultura ne’e utiliza vestuariu hanesan feto hatais tais munisípiu Viqueque, materiál kulturál babadok, kee no hatais kamiza Papa Francisco.
Tuir dadús ekipa dansa kultura munisípiu Viqueque hamutuk na’in-150 ne’ebé mai husi postu tolu Ossu, Lacluta no Viqueque.
Tuir observasaun jornalista Agência Tatoli iha konsetrasaun Hera daudaun ne’e ekipa komisaun mak kontinua hela iha fatin akonpamentu hodi preparasaun hodi simu peregrinu sira sira-ne’ebé mai husi Viqueque 7.000 ne’ebé daudaun ne’e tuir dalan mai Dili, atu aban misa solene husi Sua Santidade Papa Francisco.
Jornalista : Vitorino Lopes da Costa
Editór : Floréncio Miranda Ximenes
