DILI, 09 Setembru 2024 (TATOLI) – Ministru Juventude, Desportu, Arte no Kultura (MJDAK), Nelyo Isaac Sarmento, husu joven sira, liuliu sira ne’ebé envolve aan iha grupu arte marsiál no rituál atu kria hakmatek iha Timor-Leste, espesialmente iha Dili atu Papa Francisco nia vizita durante loron tolu ne’e bele la’o ho di’ak.
Ministru salienta katak hanesan foinsa’e ida tenke sente kontente tanba Papa Francisco hadomi tebes joven sira iha mundu. Tanba ne’e, nia mai atu hasoru povu Timór nu’udar sarani katólika no joven sira nu’udar ai-riin ba igreja nomós jerasaun foun nasaun nian.
“Ita hotu tenke kontente tanba ita-nia nasaun ne’e simu Papa dalarua ona. Tamba ne’e, ha’u husu ba joven sira ne’ebé de’it atu fó imi-nia kontribuisaun másima atu kria hakmatek hodi Papa nian prezensa iha ita-nia leet ne’e bele la’o hakmatek”, governante ne’e dehan ba Tatoli.
Nelyo Isaac hateten nia sempre hato’o ba grupu arte marsiál no rituál katak sira la’ós grupu kriminozu, tanba ne’e presiza hadomi malu. Governante ne’e fiar katak grupu sira ne’e hadomi duni nia nasaun no maun-alin sira.
“Nu’udar timoroan no hanesan sarani katólika tenke haree malu hanesan maun no alin no hado’ok aan husi violénsia, tamba nasaun presiza tebes ema hotu nia kontribuisaun hodi dezenvolve rai ida ne’e ba oin. Ha’u espera katak hotu-hotu bele halo ezame konxiénsia ho Papa nia prezensa iha ita-nia rain ne’e sei fó hakmatek ba ita hotu”, realsa.
Nia mós husu ba peregrinu hotu ho voluntariamente organiza aan hodi simu Papa nu’udar líder igreja Katólika nian.
“Tanba oportunidade ida ne’e hanesan osan-mean, tenke aproveita momentu ida no kontente tanba difísil tebes ba ema ida atu bá to’o Roma hodi haree nia. Karik hetan konfiansa husi nasaun no igreja ne’e previléjiu boot”, salienta.
Vizita Papa Francisco mai Timor-Leste durante loron 09 to’o 11 Setembru.
Notísia relevante: Komandu F-FDTL no PNTL inspesiona ikus ba seguransa vizita Papa Francisco
Jornalista: Tomé Amado
Editora: Maria Auxiliadora
