DILI, 09 setembru 2024 (TATOLI)–Peregrinu husi Illa Ataúro entuziasmu no haksolok forma iha estrada ninin Academia Comoro nia oin, preparadu no prontu simu Papa Francisco ho Dadolin ‘Na’i hiit-an mai ami-nia rain’.
Responsável Grupu Dadolin Ataúro, Cipriano Manuel, hateten, Dadolin ne’e reprezentante kultura Illa Ataúro ne’ebé hakarak oferese ba Papa.
“Ami sei ho Dadolin ‘Na’i hiit-an mai ami-nia rain’. Katak ami oferese ami-nia an ba Papa atu hasantu ami ho ita-boot nia grasa nu’udar sarani katólika ne’ebé di’ak iha sosiedade no oinsá kolabora ho sarani husi igreja seluk, nune’e bele hahí, hanai no simu matak malirin,” Cipriano Manuel, hato’o ba Agência Tatoli, iha Comoro, segunda ne’e.
Nune’e, nia espera katak ho prezensa Papa Francisco nian bele loke sarani nia fuan atu kria pás no estabilidade.
“Liu-liu ba ami Illa Ataúro oan ne’ebé iha tasi klaran, ami husu tulun no matak malirin husi Papa Francisco. Ami agradese tanba Ita-Boot bele hiit-an ona mai ami rain, espíritu, grasa natoon ona mai ami,” nia katak.
Notísia relevante : Sarani 1.045 husi Ataúro konsentra ona iha Tíbar
Nune’e, Responsável ba peregrinu hosi Illa Ataúro, Vicente Sanches Soares, hatutan liuhusi Papa nia prezensa povu hotu-hotu bele moris bele armonia liután, no estabilidade hodi hakat ba dezenvolvimentu.
“Nu’udar sarani katólika Ataúro nian, ne’ebé husi illa Repúblika Demokrátiku Timor-Leste nian. Ha’u sente onradu no kontente, vizita Papa nian bele lori matak malirin mai ami Ataúro-oan. Tanba ne’e, ha’u-nia esperansa vizita Papa sei lori domin no dame mai ita ne’ebé durante ne’e ho viziñu, família entre polítika mak la simu malu, liuhusi Papa nia prezensa bele armonia liután ita-nia estabilidade hodi hakat ba dezenvolvimentu,” nia tenik.
Cipriano Manuel, esplika, simboliza ró ne’ebé tau iha fatin ida-ne’e hodi simu Papa, “tanba ita Ataúro hanesan illa kiik-oan ne’ebé haleu ho tasi, no ita bainhira viajen mai Dili sempre ho ró, no ida-ne’e desde beiala no tempu. Simboliza ikan ne’e tanba illa Ataúro moris ho ikan,”
Peregrinu Ataúro hamutuk 1.044 no daudaun hela iha Pelican Paradise. Hosi ne’e peregrinu na’in 150 mak reprezentante hodi simu Papa Francisco iha dalan portokolu.
Jornalista : Osória Marques
Editora : Julia Chatarina
