DILI, 09 setembru 2024 (TATOLI)—Labarik feto ida ho naran kompletu Rosaline Elmathea Listya de Heoner ‘Baby Skylla’ ho tinan ida resin, segunda ne’e, hetan bensaun direita husi Papa Francisco, bainhira halo pasajen iha dalan husi Aeroportu Comoro bá Nunsiatura Apostólika, Faról.
“Nu’udar inan ida, ha’u sente kontente loos no agradese ba Maromak tanba ami-nia oan feto Rosaline Elmathea Listya de Heoner bele simu bensaun ne’e, nu’udar mós ba ami-nia família kiik ida ne’ebé ami harii ona oinsá bele moris ho domin no armonia tuir Igreja Katólika nia doutrina,” Inan husi labarik ne’ebé hetan bensaun, Relifonia Listya ningsi de Jesus, informa ba Agência Tatoli, via telefónika.
Sarani rihun forma iha dalan ninin Ponte CPLP, Fatuhada, Palásiu Prezidensiál, Faról, to’o tama rezidénsia Nunsiatura Apostólika, simu Papa Francisco ho delegasaun husi Papua Nova Guiné, ne’ebé to’o iha Aeroportu Internasionál Prezidente Nicolau Lobato, Comoro iha tuku 14:20.
Notísia relevante : Sarani sira fila ho kontente hafoin haree Papa Francisco
Relifonia Listya konsidera bensaun ne’e hanesan grasa ida tanba ohin molok mai hein Amu Papa, nia ho nia kaben iha uma konsege hirus malu kona-ba atu fó han labarik hodi bá hein Amu Papa.
“Fatin ne’ebé ami hamriik no ha’u-nia oan hodi hetan bensaun husi Amu Papa ne’e iha área Ai-mutin Merkadu Comoro ho Zita Plaza nia klaran, ha’u agradese mós ba ha’u-nia família sira tanba sira-nia esforsu hotu mak ha’u-nia oan hetan bensaun,” nia haktuir.
Família husi Rosaline Elmathea Listya husi aldeia Pitileti, suku Com, postu administrativu Lautem, munisípiu Lautém no daudaun hela iha Bebonuk, aldeia 20 setembru, Bairru Gansaji.
Jornalista : Arminda Fonseca
Editora : Julia Chatarina
