DILI, 09 setembru 2024 (TATOLI) – Sarani sira ne’ebé hein husi dadeer to’o loraik fila bá uma ho kontente hafoin haree Papa Francisco, maske lato’o minutu.
Silvina da Costa espresa nia sentimentu alegria hafoin simu bensaun Papa nian. “Ha’u kontente tebes no laran dodok ho kontente nian, tanba ohin hetan duni Papa Fransicc no konsege simu duni bensaun”, Silviana da Costa ne’ebé mai husi munisipíu Aileu dehan ba Tatoli, iha Farol.
Nia dehan maske maske loron-manas no hein ho kondisaun hamlaha, maibé la kolen hodi hein Santu Padre.
“Ohin, ami mai hein iha ne’e dadeersan purvolta tuku 08h hanesan ne’e to’o ami hamlaha, maibé ami lori bee hodi hemu atu nafatin hein Santu Papa. Agora, ami fila bá uma ho kontente tanba mai la saugate no konsege hetan”, nia dehan ho espresaun hamnasa.
Notísia relevante: Maske sofre moras AVC, Manuel lakolen hein Papa hodi simu bensaun
Iha fatin hanesan, Acácio Ximenes dehan nu’udar timoroan, vizita Papa ne’e hanesan grasa ida, tanba depoizde tinan 35 mak Papa Francisco mai fali Timor-Leste. “Papa ida-ne’ebé umilde tebes, depois fó nia atensaun ba liu ema ki’ak sira. Papa intelijente tebes, tanba nia fó atensaun ba ema ki’ik no fó atensaun mós ba meiu ambiente”, nia katak.
Tuir observasaun, bainhira Papa liu husi dalan protokolu sarani sira hakilar no kontente dehan Viva Papa! Viva Papa! Iha balun tanis bainhira haree Papa nia oin.
Notísia relevante: Timoroan na’in-rua tara tais no fó ai-funan ba Papa Francisco
Vizita Papa Francisco mai Timor-Leste hahú ho resesaun ofisiál bainhira Papa to’o iha Aeroporto Internasionál Prezidente Nicolau Lobato iha tuku 14h27 ho aviaun Air Niugini.
Depoizde ne’e to’o, Papa ho nia delegasaun sei bá deskansa iha Nunsiatura Apostolika iha Motael, Dili.
Hafoin ne’e, iha tuku 18h00, Papa Francisco ne’ebé hanesan Xefe Estadu Vatikanu nian sei bá iha Palásiu Prezidensiál Nicolau Lobato, Bairru Pite, hodi hala’o enkontru ho Prezidente Repúblika, José Ramos Horta.
Iha Palásiu Prezidensiál Nicolau Lobato, iha tuku 19h00 kalan ne’e, Papa Francisco sei lee nia diskursu ne’ebé partisipa husi Xefe Governu no membru Governu, sosiedade sivíl, korpu diplomátiku no konvidadu sira seluk hafoin fila hikas ba Nunsiatura Apostolika Motael.
Notísia relevante: Koñese ajudante ne’ebé dudu Papa Francisco nia kadeira roda
Jornalista: Abílio Elo Nini
Editora: Maria Auxiliadora
