DILI, 09 setembru 2024 (TATOLI)—Papa Francisco simu konvite husi Xefe Estadu no autoridade Igreja atu hala’o vizita pastorál ba da-43 ba estranjeiru, ne’ebé Papa Francisvo hala’o voo husi Roma iha 02 setembru 2024 no sei fila-fali ba Roma iha 13 setembru 2024.
Santu Padre sei hala’o nia viajen dahuluk iha Jakarta-Indonézia, iha 03-06 setembru 2024 no vizita Papua Novaguine hahú husi 06-09 setembru 2024, no iha segunda (09 setembru 2024) ohin, Papa Francisco to’o iha Dili no sei hala’o vizita pastorál to’o 11 setembru 2024.
Iha Papa Francisco nia vizita pastorál iha Indonézia, Papua Novaguine no Timor-Leste ne’e, baihnira tuun husi aviaun Papa Francisco sempre tuur iha kadeira roda no ninia xefe ajudante Vatikanu nian ida mak dudu hodi halo movimentu ba-mai. Nune’e, Agência TATOLI sei lori ita-boot sira ba hatene figura xefe ajudante Vatikanu nian ne’ebé sempre iha Papa Francisco nia leet hodi dudu kadeira roda ba-mai ne’e;
Sé mak dudu Papa Francisco nia kadeira roda?
Foin daudaun ne’e Papa Francisco indika asistente foun ne’ebé sempre iha Papa nia sorin durante hala’ o vizita pastorál iha Asia no Oceania. Figura ne’e mak Daniele Cherubin, antigu membru ne’ebé tau-matan ba Vatikanu ne’ebé hahú simu kargu hanesan asistente Papa nia kuartu ne’ebé hahú husi 28 maiu 2024.
Pozisaun ne’e nu’udar, papel importante iha Papa Fransico ninia moris loro-loron. Tanba, xefe ajudante Vatikanu nian ne’e iha responsabilidade boot atu tulun Papa Francisco iha atividade privadu sira loro-loro nian.
Antes ne’e, xefe ajudante ba Papa ne’e mak Sandrone Mariotti, ne’ebé hala’o kna’ar durante tinan 12 nia laran. Marrioti ne’ebé nomeia husi Papa Bendito XVI hafoin ika eskandalu Fatiliks, nia sai tiha ona figura ida-ne’ebé Papa Francisco tau fiar ba nia durante 2013. Maibé, hafoin dekade ida-nia laran, nia serbí Papa Francisco, nia hetan kargu foun iha Vatikanu no Papa Francisco indika Daniele Cherubin ne’ebé idade sei foinsa’e hodi trtoka Mariotti.
Prezensa Daniele Cherubin hanesan Companheiro do Papa ba dahuluk ne’ebé públiku haree no hatene ne’e, bainhira iha misa solene ida ba loron mundial ba labarik iha Kampu Santu Pedro Bazilika Vatikanu-Roma, nu’udar momentu istóriku ida-ne’ebé hatudu ninia papel foun iha Vatikanu.
Daniele Cherubin nia kna’ar halo saida?
Hanesan xefe ajudante, Daniele Cherubini ninia responsabilidade atu aajuda Papa Francisco ninia moris loro-loron nian iha Vatikanu, nomós bainhira Papa hala’o vizita pastorál ba estranjeiru. Servisu ida-ne’ebé nia bele halo mak ajuda Papa Francisco bele movimentu ho kadeira roda, tanba Papa Francisco ninia kondisaun fíziku moras hela.
Aleinde ne’e, Cherubini ninia responsabilidade ida mak atu prepara Papa Francisco ninia nesesidade hotu-hotu, inklui vistuáriu sira no sasán privadu sira seluk. Pozisaun ne’e mós presiza konfiansa ne’ebé aas, tanba xefe ajudante Vatikanu nian ne’e tenke kuidadu Papa Francisco ninia privasidadre no seguransa iha situasaun saida de’it no iha fatin ne’ebé de’it.
La’ós ne’e de’it. Daniele Cherubini mós tenke servisu hamutuk ho ekipa médiku privadu Papa Francisco nian hanesan doutór no pesoál saúde (enfermeiru) sira, atu haree ba Papa Francisco nia saúde ne’e di’ak durante viajen ka hala’o vizita pastorál ne’ebé han tempu kle’ur hanesan vizita Aiha Asia no Oseania daudaun ne’e.
Razaun Papa Francisco uza kadeira roda
Razaun Papa Francisco uza kadeira roda ne’e, tuir notísia husi Spectrum News iha kuarta (04 setembru 2024), hafoin sua Santidade Papa Francisco sofre nia ain-tuur nia ruin tohar no “radang ligamen” iha ninia ain-kuana, hahú husi tinan 2022. Maibé, Papa rejeita atu halo operasaun tanba Papa lakohi sente ninia efeitu negative mosu iha longu prazu husi anestesi.
Papa Francisco hahú uza kadeira roda no mosu iha públiku nia oin ba dahuluk iha 05 maiu 2022, bainhira Papa hasoru malu ho madre sira no líder kongregasaun sira iha mundu iha Vatikanu. Iha biban ne’ebá, Papa Francisco rekoñese hala’o hela “Intervensi infiltrasi” kiik-oan ida tanba ninia “ligamen” ne’e ladun di’ak.
Ho kondisaun ne’e, Papa Francisco husu deskulpa tanba nia labele hamriik hodi simu bainaka sira.
“Iha problema, ain-tuur ne’e la funsiona. Ha’u tenke halo tuir doutór nia orientasaun atu ha’u labele hamriik,” dehan Papa Francisco ne’ebé sita husi The Guadrian (05 maiu 2022).
Hahú husi uza kadeira roda, Papa Francisco sempre hetan pergunta kona-ba ninia futuru papado (kepausan) nian. Ho utilizasaun kadeira roda ba ninia viajen ka vizita pastorál sira-ne’e, limita ninia programa no kapasidade atu hamutuk ho ema ka sarani barak.
Papa Francisco hateten, nia seidauk hanoin atu rezigna-aan. Maske nune’e, Papa Francisco konsiente katak ninia atividade tenke halo ho neineik ka tarde uitoan.
“Ha’u sente, ho ha’u-nia idade agora no ho limitasaun sira hanesan ne’e, ha’u tenke bele poupa enerjia, atu nune’e ha’u bele serbí uma kreda ka hanoin atu rezigna-aan,” Papa hateten ne’ebé sita husi ABC News iha 30 jullu 2023 liubá ne’e.
TATOLI
