DILI, 09 Setembru 2024 (TATOLI) – Sura de’it oras atu simu vizita Papa Francisco iha Timor-Leste, sarani balun hahú daudaun hakat ona mai via públika hodi hein Santidade Papa.
Maske Papa to’o iha Timór iha tuku 14h10, maibé entuziazmu husi populasaun atu hamriik iha oin hodi haree direta Papa maka’as tebes.
Hanesan sarani sira husu Parókia Katedrál, Manuela de Araújo no Romana de Araújo Xavier, husi Ainaro ne’ebé hela iha suku Bairru Pité, ne’ebé daudaun hein ona iha Palásiu Prezidensiál nia oin. Sira sai husi uma iha dadersán tuku hitu tanba de’it hakarak atu hamriik iha oin.
“Dadersán de’it mai hein ona Papa, tanba hakarak hetan fatin iha oin hodi haree diretamente Papa nia oin. Orsida Papa sei mai loraik, maibé tanba ami hakarak hetan fatin iha oin, tanba orsida loraik ne’e ita mai hadau malu fatin. Ita iha kotuk loos, la hetan Papa”, Manuela ko’alia ba Tatoli iha arreadór Palásiu Prezidensiál, Bairru Pite, Dili.
Nia dehan mai hein sedu tanba momentu ida ohin ne’e importante tebes, tanba liu tinan 30-resin mak foin hetan fali vizita Papa nian. “Nu’udar sarani, fiar iha Maromak la sente kolen ka hamlaha. Importante mak oinsá atu simu Papa no haree Papa. Ita halo zejún loron ida de’it la mate. Papa de’it nia husik nia tempu mai, ita mós tenke husik tempu oituan hodi simu nia”, dehan.
Liafuan hanesan hato’o mós hato’o husi Romana Xavier. Nia parte hatene Papa mai loraik maibé nu’udar sarani ne’ebé fiar na’in prepara aan antes.
“Ami mak hakarak mai sedu atu simu aman Maromak, liuhuisi Papa nia vizta. Ami hein hanesan hodi Papa ho aviaun tun iha Aeroportu Internasionál Nicolau Lobato, ami hamriik ona iha oin. Ohin, ami mai lori kedas bee no hahán balun hanesan biskuit hodi han no bee hodi hemu halimar hein Papa mai”, nia haktuir.
Tuir observasaun Tatoli, rute Palásiu Prezidensiál nian, parte saúde mós hamutuk ho Krús Vermella Timor-Leste (CVTL) loke postu ki’ikoan iha fatin besik postu tránzitu nian.
Médika Ana de Mencia, husi Sentru Saúde Vera Krús hateten sira-nia parte prontu atu halo atendimentu iha kualkér oras ba komunidade ne’ebé presiza.
“Ami iha ne’e halo kolaborasaun ho CVTL, iha médiku no enfermeiru no ami iha ekipamentu natoon no ai-moruk sira ne’ebé uza urjente ne’e ami preparadu”, dehan.
Kona-ba transporte sira laiha maibé karik iha situasaun ruma ne’ebé bele presiza mak bolu ambulánsia mai. “Ekipa ne’ebé iha ne’e hamutuk na’in-neen, inklui husi saúde no CVTL”, salienta.
Papa Francisco sei vizita Timor-Leste entre loron 09 to’o 11 Setembru. Iha vizita ne’e, iha segunda, 09 Setembru 2024, iha tuku 11h40 oras Papua Nova Guiné (10h40 otl), Papa Francisco hamutuk ho delegasaun sei semo husi Aeroportu Internasionál Jacksons Port Moresby mai Dili, Timor-Leste, no tuir oráriu sei to’o iha Aeroportu Internasionál Nicolau Lobato, Comoro, iha tuku 14h10. Depoizde ne’e, Papa ho nia delegasaun sei bá deskansa iha Nunsiatura Apostolika iha Motael, Dili.
Hafoin ne’e, iha tuku 18h00, Papa Francisco ne’ebé hanesan Xefe Estadu Vatikanu nian sei bá iha Palásiu Prezidensiál Nicolau Lobato, Bairru Pite, hodi hala’o enkontru ho Prezidente Repúblika, José Ramos Horta. Iha oras hanesan, Primeiru-Ministru, Kay Rala Xanana Gusmão, sei hasoru malu ho ninia omólogu Kardeál Pietro Parolin, ne’ebé sei la’o durante minutu 20 nia laran.
Notísia relevante: Dili hakmatek hein Santu Padre Papa Fransisco
Jornalista: Arminda Fonseca
Editora: Maria Auxiliadora
