DILI, 09 setembru 2024 (TATOLI)–Sarani sira husi Palapaço hamriik iha dalan ninin ho entuziasmu no esperansa katak prezensa Papa Francisco mai Timor-Leste ne’e bele lori pás no domin.
“Ami kontente loos, tanba vizita São Pedro nia saseluk ne’e mai ba dala-rua. Sua Santidade ninia prezensa ne’e mai halibur sarani katólika sira iha territóriu tomak inklui mós relijiaun seluk hodi hein no hakarak simu bensaun husi Sua Santidade. Ami iha esperansa boot katak Sua Santidade ninia prezensa ne’e bele lori pás no domin mai ita-nia rai, liu-liu ba ita-nia joven sira iha Timor, nune’e mós ba sarani katólika hotu, ne’ebé pás no armonia ba ita ida-idak nia família, nomós ba nasaun Timor-Leste,” Reprezentante Sarani iha Palapaço, Filomena Freitas, hateten iha Palapaço, segunda ne’e.
Notísia relevante : Sarani Baucau simu Papa Francisco ho dansa kultura iha Ponte CPLP
Sarani Madalena de Jesus, ho haksolok hein prezensa Amu Papa tanba hakarak hetan bensaun.
“Ami sente kontente no orgullu tebes. Ami ohin dadeer kedas mai hamriik iha ne’e hein Sua Santidade ninia prezensa maibé ami la sente hamlaha no hamrook no nein atu kolen tanba ida-ne’e São Pedro nia saseluk ne’ebé mak sei mai fó bensaun ba ita-nia país Timor-Leste,” nia akresenta.
Sarani ne’e tau esperansa, iha vizita Papa Francisco ne’e, timoroan sira sei haksolok liután armónia no hela ho pás.
“Ho esperansa katak prezensa Sua Santidade Papa mai ne’e, ita sei hetan pás, ksolok no armonia liután. Ita-nia joven sira sei moris nu’udar maun alin no hakribi violénsia no lori Timor-Leste ba oin,” nia tenik.
Jornalista : Osória Marques
Editora : Julia Chatarina
